Թուրքիան արագացնում է Հայաստանի հետ սահմանային անցակետի բացման աշխատանքները

Թուրքական «Ալիջան» սահմանային անցակետի նախապատրաստական ​​աշխատանքներն ակտիվացել են։ Սպասվում է, որ այն կդառնա Թուրքիայի և Հայաստանի հարաբերությունների կարգավորման գործընթացում ամենակարևոր կամուրջներից մեկը, գրում են թուրքական լրատվամիջոցները։

Իգդիրի նահանգապետ Ֆըրաթ Թաշոլարը ծանոթացել է սահմանային անցակետում իրականացվող վերանորոգման և ենթակառուցվածքային աշխատանքներին։ Նշվում է, որ ինտենսիվ ջանքեր են գործադրվում՝ «Ալիջան» սահմանային անցակետը վերջնական բացելու համար, որը 1993 թվականից ի վեր փակ է քաղաքացիական անցման համար, սակայն ժամանակավորապես բացվել է վերջին երկրաշարժերից հետո: Նահանգապետ Թաշոլարը տեխնիկական խմբի ուղեկցությամբ ստուգել է սահմանի երկայնքով գտնվող շենքերն ու անցակետերի ուղիները: Ստուգայցի ընթացքում նահանգապետն ընդգծել է, որ աշխատանքները նախատեսվում է ավարտել կարճ ժամանակում:

Ըստ թուրքական լրատվամիջոցների՝ «Ալիջան» սահմանային դարպասի բացումը ոչ միայն դիվանագիտական ​​քայլ է, այլև տարածաշրջանային տնտեսության համար կարևոր «փրկարար օղակ»։ Ասվում է, որ դարպասի գործարկման նպատակներից են՝ սահմանային առևտրի վերակենդանացումը, Իգդիրում և հարակից նահանգներում առևտրային գործունեության աճը, լոգիստիկ առավելությունը՝ Կովկասով տրանսպորտի համար ավելի կարճ երթուղիները, զբոսաշրջային շարժունակությունը՝ երկու երկրների միջև փոխադարձ այցելություններ, որոնք նպաստում են տարածաշրջանային զբոսաշրջությանը։

Թարգմանությունը՝ Էմմա Չոբանյանի