«Վտանգավոր նախադեպ Մոսկովյան փողոցում»․ շինթույլտվություն կա, բայց հարցերը մնում են. ՏԵՍԱՆՅՈՒԹ

Մոսկովյան փողոցի 37 շենքի թիվ 12 հասցեում բացված մուտքն օրինական է։ Factor TV-ի գրավոր հարցմանն ի պատասխան՝ հայտնել են Երևանի քաղաքապետարանից։ 

2025 թվականի հուլիսին քաղաքապետարանն այդ հասցեում նախագծման թույլտվություն է տվել, ապա շուրջ մեկ ամիս անց մուտքի կազմակերպման, նկուղային և բնակելի առաջին հարկերի միավորման, տարածքները հասարակական նշանակության տարածքների վերակառուցման նպատակով տրամադրել է շինթույլտվություն։ 

Ճարտարապետ Սարհատ Պետրոսյանը դեռ տարեվերջին ահազանգել էր, որ շենքի ճակատային հատվածում արված բացվածքը սեյսմիկ առումով խոցելի է դարձնում շենքը և կարող է վտանգավոր նախադեպ դառնալ։ 

Ճարտարապետի բարձրացրած խնդիրների մասին հարցեր էինք ուղղել Երևանի քաղաքապետ Տիգրան Ավինյանին, մասնավորապես, հետաքրքրվելով՝ օրինակա՞ն է, եթե այո, ապա ի՞նչ հիմունքներով է շինթույլտվություն տրվել։ Տիգրան Ավինյանը խոստացել էր պարզել։

Քաղաքապետարանից ստացված գրավոր պատասխանում նշվում է, որ նախագծային փաստաթղթերի, փորձաքննության եզրակացության հետ տրվել է նաև շենքի սեփականատերերի մեծամասնության համաձայնությունները, որոնք հաստատել է «Կենտրոն-1» համատիրության կառավարիչ Արթուր Արշակյանը: 

Կառավարիչը քանի՞ ստորագրություն է հաստատել․ հեռախոսազանգի սկզբում նա, անակնկալի գալով, ասաց, որ այդ հասցեն իր ղեկավարած համատիրության վերահսկողության տիրույթում չէ, ապա ստուգումներից հետո հայտնեց, որ թիվ չի կարող նշել։ 

Ավարտական ակտ դեռևս չի տրամադրվել, շինարարությունն ընթացքի մեջ է՝ արձանագրել է Factor TV-ի տեսախցիկը։  

Մանրամասները՝ տեսանյութում։

Արփի Հակոբյան