Ադրբեջանցի քաղէմիգրանտներն ԱՄՆ փոխնախագահին կոչ են արել Ալիևի հետ հանդիպմանը բարձրացնել քաղբանտարկյալների հարցը

Ադրբեջանի քաղաքական էմիգրանտների համակարգող կենտրոնը (ASİMKOM) կոչ է հղել ԱՄՆ փոխնախագահ Ջեյ Դի Վենսին՝ Բաքու այցի ընթացքում նախագահ Իլհամ Ալիևի հետ հանդիպմանը բարձրացնել քաղբանտարկյալների հարցը։ ASİMKOM-ի կոչում նշվում է Ադրբեջանում մարդու իրավունքների վիճակի, մասնավորապես, քաղբանտարկյալների հարցի քննարկման հրատապ կարևորությունը։

«Հարյուրավոր մարդիկ, այդ թվում՝ լրագրողներ, ընդդիմադիր ակտիվիստներ և առաջնորդներ, մարդու իրավունքների պաշտպաններ և քաղաքացիական հասարակության այլ ներկայացուցիչներ, ներկայումս Ադրբեջանում քաղաքական դրդապատճառներով բանտարկված են։ Առնվազն 340 մարդ ճանաչվել է որպես քաղբանտարկյալ։ Այս իրավիճակն Ադրբեջանի միջազգային պարտավորությունների և համընդհանուր ճանաչված հիմնարար իրավունքների ու ազատությունների ակնհայտ խախտում է։ Միացյալ Նահանգների սկզբունքային մոտեցումը քաղբանտարկյալների հարցի նկատմամբ այնպիսի երկրների հետ հարաբերություններում, ինչպիսիք են Բելառուսը և Վենեսուելան, ստեղծել է կարևոր և խրախուսական նախադեպեր: Մենք հույս ունենք, որ նմանատիպ հստակ և վճռական դիրքորոշումը կարող է զգալի և դրական ազդեցություն ունենալ Ադրբեջանի ղեկավարության հետ երկխոսության վրա, մասնավորապես՝ կոչ անելով քաղբանտարկյալներին անվերապահորեն ազատ արձակել»,- ասվում է դիմումում։

Վենսը Բաքու կժամանի առաջիկա օրերին։

Սպասվում է, որ տարածաշրջանային այցի շրջանակում նա նախ փետրվարի 9-ին կայցելի Հայաստան, ապա Ադրբեջան։

Թարգմանությունը՝ Էմմա Չոբանյանի