27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Մոսկվայում մահափորձ է կատարվել ՊՆ գեներալի դեմ
Քաղաքականություն
06.02.2026 | 13:48
Մոսկվայում անհայտ անձը մի քանի կրակոց է արձակել գեներալ-լեյտենանտ Վլադիմիր Ալեքսեևի ուղղությամբ, հաղորդում են ռուսական լրատվականները՝ հղում անելով Քննչական կոմիտեին, գրում է The Insider-ը։
Հարձակումը տեղի է ունեցել Վոլոկոլամսկի մայրուղու վրա գտնվող բնակելի շենքում: Անհայտ անձը մի քանի անգամ կրակել է Ալեքսեևի մեջքին և փախել։ Ալեքսեևը հոսպիտալացվել է։
Հարձակվողին որոնում են։ Մահափորձի կապակցությամբ հարուցվել է քրեական գործ՝ սպանության փորձի և հրազենի ապօրինի շրջանառության հոդվածներով։
Վլադիմիր Ալեքսեևը Ռուսաստանի զինված ուժերի գլխավոր շտաբի գլխավոր վարչության (ռազմական հետախուզություն, GRU) պետի առաջին տեղակալ է։ 2023 թվականի ամռանը Եվգենի Պրիգոժինի ապստամբության ժամանակ նա տեսաուղերձ էր ձայնագրել «Վագների» մարտիկների համար՝ կոչ անելով նրանց «խելքի գալ», իսկ ավելի ուշ մասնակցել է Պրիգոժինի հետ բանակցություններին։
Հենց Ալեքսեևն էր վերահսկում նոր «Ռեդուտ» խումբը, որը նախատեսված էր Պրիգոժինի «Վագներ»-ին փոխարինելու համար։
The Insider-ի տվյալներով՝ Ալեքսեևը նաև վերահսկում է Silk Road միջազգային ավտոմոբիլային ռալլիի նախագիծը և օգտագործում է մրցարշավները՝ իր գործակալների համար աշխատանք ապահովելու և քաղաքական կապեր հաստատելու նպատակով։
2019 թվականին Եվրամիությունը, իսկ 2020 թվականին՝ Մեծ Բրիտանիան Ալեքսեևին ներառել են պատժամիջոցների ցուցակում՝ կապված 2018 թվականին Սոլսբերիում «Նովիչոկ» քիմիական զենքի օգտագործման հետ։
Թարգմանությունը՝ Էմմա Չոբանյանի
