Էրդողանը բարձր է գնահատել ԱՄՆ-Իրան բանակցությունները

Ուրբաթ կայանալիք ԱՄՆ-Իրան հնարավոր բանակցություններին ընդառաջ՝ Թուրքիայի նախագահ Ռեջեփ Թայիփ Էրդողանը  հայտարարել է, որ Անկարան չի ցանկանում նոր պատերազմ տարածաշրջանում։ Նա նշել է, որ երկու կողմերին էլ բանակցությունների սեղանի շուրջ ունենալը կարևոր է և կոչ է արել երկխոսություն սկսել երկու երկրների միջև ճգնաժամը լուծելու համար։

Նախապես Թուրքիան էր նշվում որպես Իրանի և ԱՄՆ-ի միջև ուղիղ բանակցությունների անցկացման հավանական վայր։ Սակայն չորեքշաբթի Իրանը հայտարարեց, որ բանակցությունները տեղի կունենան Օմանի մայրաքաղաք Մասկատում՝ լուրերի ֆոնին, որ բանակցությունները կարող են ձախողվել ձևաչափի և վայրի շուրջ անհամաձայնությունների պատճառով:

Լրատվամիջոցներն ավելի վաղ հայտնել էին, որ Իրանը դեմ է ԱՄՆ-ի հետ հնարավոր բանակցություններում իր բալիստիկ հրթիռային ծրագրերի ներառմանը։

«Մենք ամեն ինչ անում ենք, որ Միացյալ Նահանգների և Իրանի միջև այս լարվածությունը տարածաշրջանը նոր հակամարտության և քաոսի մեջ չներքաշի։ Մենք հստակ արտահայտեցինք մեր դեմ լինելը Իրանում ռազմական միջամտությանը։ Ես տեսնում եմ, որ կողմերը տեղ են ազատում դիվանագիտության համար, և սա դրական զարգացում է։ Հակամարտությունները խնդիրների լուծում չեն, և նրանք պետք է հաշտեցման հիմքեր գտնեն։ Կարծում եմ, որ եթե սպասվող բանակցությունները հաջողությամբ պսակվեն, պետք է բանակցություններ լինեն նաև առաջնորդների միջև»,- հայտարարել է Էրդողանը։

Հարցին՝ որքանո՞վ են Սաուդյան Արաբիան և Պարսից ծոցի երկրները համաձայն Թուրքիայի իրանական քաղաքականության հետ՝ հրաժարվելով իր թվացյալ ամերիկամետ մոտեցումից, Էրդողանը պատասխանել է, որ Սաուդյան Արաբիայի նման երկրները նպաստում են տարածաշրջանում խաղաղությանը։

«Մենք նոր պատերազմ չենք ուզում, ես միշտ դա եմ ասել։ Սաուդյան Արաբիան նույնպես տուժում է ցանկացած հակամարտությունից։ Մեր զգայունությունն այս հարցում համընկնում է։ Լիակատար խաղաղությունն ու կայունությունը մեծ հաղթանակ են մեր տարածաշրջանի համար։ Հակամարտությունների, արյունահեղության և արցունքների գերիշխող տարածաշրջանը մեծ կորուստ է։ Մեզ բոլորիս համար ամենաողջամիտ ընտրությունը խաղաղության կողմն անցնելն է։ Մենք պետք է ամրապնդենք խաղաղ դիվանագիտությունը»,- ընդգծել է նա։

Թարգմանությունը՝ Էմմա Չոբանյանի