Մակրոնի բանագնացը Մոսկվայում ռուս պաշտոնյաների հետ է հանդիպել՝ Ուկրաինայում խաղաղության բանակցությունների համար

Ֆրանսիայի նախագահ Էմանուել Մակրոնի բարձրաստիճան դիվանագետը երեքշաբթի Մոսկվայում էր՝ ռուս պաշտոնյաների հետ բանակցություններ վարելու համար։ Այս մասին հայտնել են հանդիպմանը ծանոթ դիվանագիտական ​​աղբյուրները, գրում է France 24-ը։

Էմանուել Բոնը, որը 2019 թվականից ղեկավարում է Մակրոնի վարչակազմի դիվանագիտական ​​բաժինը, հանդիպել է Կրեմլի պաշտոնյաների հետ։ Աղբյուրն այլ մանրամասներ չի հայտնել, բացի այն, որ նպատակն է երկխոսություն վարել հիմնական հարցերի, ամենակարևորը՝ Ուկրաինայում պատերազմի շուրջ։

Ֆրանսիայի նախագահականը ո՛չ հաստատել, ո՛չ հերքել է բանակցությունների մասին տեղեկությունները, սակայն նշել է. «Ինչպես նախագահն ասաց երեկ՝ քննարկումները տեղի են ունենում տեխնիկական մակարդակով՝ լիակատար թափանցիկությամբ և նախագահ Վլադիմիր Զելենսկիի ու հիմնական եվրոպացի գործընկերների հետ խորհրդակցությամբ»։

Երկու դիվանագիտական ​​աղբյուրներ հայտնել են, որ դաշնակիցները տեղեկացվել են նախաձեռնության մասին, և որ Բոնը բանակցություններ է վարել Ռուսաստանի նախագահ Վլադիմիր Պուտինի ավագ օգնական Յուրի Ուշակովի հետ։

Էմանուել Մակրոնը դեկտեմբերին հայտարարել էր, որ եվրոպացիները ստիպված կլինեն վերսկսել ուղիղ բանակցությունները Պուտինի հետ, եթե ԱՄՆ-ի գլխավորությամբ Ուկրաինայի խաղաղության համաձայնագրի կնքման վերջին ջանքերը ձախողվեն։ Եվրոպացի առաջնորդները, որոնք զգուշանում են Պուտինի ռազմական նկրտումներից, դժգոհում են ԱՄՆ նախագահ Դոնալդ Թրամփի վարչակազմի կողմից վարվող խաղաղության բանակցություններից իրենց դուրս մղելուց, փոխարենը ստիպված լինելով ամրապնդել Ուկրաինայի բանակցային դիրքերը կողքից։

Ֆրանսիայի նախագահը երեքշաբթի լրագրողներին ասել էր, որ ջանքեր են գործադրվում Պուտինի հետ երկխոսությունը վերսկսելու համար։

«Այն նախապատրաստվում է, ուստի կան քննարկումներ, որոնք անցկացվում են տեխնիկական մակարդակով։ Կարևոր է, որ եվրոպացիները վերականգնեն իրենց սեփական քննարկման ուղիները»,- ասել էր նա։

Թարգմանությունը՝ Էմմա Չոբանյանի