Արաղչին հայտնել է՝ ԱՄՆ-ն ու Իրանը ուրբաթ բանակցություններ կանցկացնեն Օմանում

Իրանի և ԱՄՆ պաշտոնյաները հաստատել են, որ երկու երկրների միջև հանդիպումը տեղի կունենա Օմանի մայրաքաղաք Մասկատում ուրբաթ՝ փետրվարի 6-ին, գրում է DW-ն։

Մինչ այս, տեղեկություն էր տարածվել, թե կողմերի միջև բանակցությունները ձախողվում են ձևաչափի և վայրի վերաբերյալ անհամաձայնությունների պատճառով, ինչը կասկածներ է առաջացնում բանակցությունների ճակատագրի վերաբերյալ։ Սակայն Իրանի արտաքին գործերի նախարար Աբբաս Արաղչին հայտարարել է, որ միջուկային բանակցությունները նախատեսված են ուրբաթ՝ Մասկատում:

«ԱՄՆ-ի հետ միջուկային բանակցությունները նախատեսված է անցկացնել Մասկատում ուրբաթ՝ մոտավորապես ժամը 10-ին։ Շնորհակալ եմ մեր օմանցի եղբայրներին բոլոր անհրաժեշտ միջոցները ձեռնարկելու համար»,- գրել է նա X-ում։

Սպիտակ տան պաշտոնյաները հաստատել են, որ հանդիպումը տեղի կունենա Օմանում ուրբաթ օրը: Մինչ այդ, շաբաթվա սկզբին պաշտոնյաները հայտարարել էին, որ հանդիպումը, հավանաբար, տեղի կունենա Թուրքիայում:

Չնայած բանակցությունների հաստատմանը՝ չկա որևէ նշան, որ կողմերն ընդհանուր լեզու են գտել օրակարգի շուրջ։ Իրանը պնդում է, որ բանակցությունները սահմանափակվեն արևմտյան երկրների հետ իր երկարատև միջուկային վեճի քննարկմամբ։

ԱՄՆ պետքարտուղար Մարկո Ռուբիոն, սակայն, ասել է, որ միջուկային հարցերից բացի՝ բանակցությունները պետք է ներառեն Իրանի բալիստիկ հրթիռների ծրագիրը, Մերձավոր Արևելքում զինված պրոքսիներին Թեհրանի աջակցությունը և սեփական ժողովրդի նկատմամբ նրա վերաբերմունքը։

Միաժամանակ, իրանցի բարձրաստիճան պաշտոնյան Reuters-ին  հայտնել է, որ Իրանի հրթիռային ծրագիրը «հանվել է բանակցային սեղանից»։ Մեկ այլ բարձրաստիճան իրանցի պաշտոնյա ասել է, որ Թեհրանը կողջունի միջուկային վեճի շուրջ բանակցությունները, սակայն ԱՄՆ-ի պնդումը ոչ միջուկային հարցերը լուծելու վերաբերյալ կարող են վտանգել բանակցությունները։

Բանակցությունների նախապատրաստման անորոշությունների ֆոնին՝ ԱՄՆ նախագահ Դոնալդ Թրամփը շարունակում է  ճնշում գործադրել Իրանի գերագույն առաջնորդ այաթոլլահ Ալի Խամենեիի նկատմամբ։

«Ես կասեի, որ նա պետք է շատ անհանգիստ լինի»,- ասել է Թրամփը ամերիկյան NBC News հեռուստաալիքին տված հարցազրույցում։

Թրամփի խոսքով՝ Իրանը ծրագրում էր նոր միջուկային օբյեկտ կառուցել՝ ի պատասխան հունիսին Իսրայելի և Իսլամական Հանրապետության միջև պատերազմի ժամանակ իրանական միջուկային օբյեկտների վրա ԱՄՆ-ի հարվածների։

«Նրանք մտածում էին երկրի մեկ այլ մասում նոր օբյեկտ հիմնելու մասին։ Մենք իմացանք այդ մասին, և ես ասացի՝ «եթե դա անեք, մենք ձեզ հետ շատ վատ բաներ կանենք»»,- ասել է Սպիտակ տան ղեկավարը։

Վերջին շաբաթներին Թրամփը զգալիորեն մեծացրել է ԱՄՆ ռազմական ներկայությունը տարածաշրջանում և հրաժարվում է բացառել նոր ռազմական գործողությունները։

Թարգմանությունը՝ Էմմա Չոբանյանի