Երևանը պետք է հաշվի առնի, որ ԵՄ-ն վերածվում է ռազմաքաղաքական միության ագրեսիվ ՌԴ-ի նկատմամբ. Օվերչուկ

ԵՄ-ին հնարավոր անդամակցության որոշումը հայ ժողովրդի ընտրությունն է, սակայն Երևանը պետք է հաշվի առնի Եվրամիության փոփոխվող բնույթը, որը տնտեսական միությունից վերածվում է ռազմաքաղաքականի։ Այս մասին հայտարարել է Ռուսաստանի փոխվարչապետ Ալեքսեյ Օվերչուկը, գրում է ՏԱՍՍ-ը։

«Եթե նրանք երբևէ արդեն պաշտոնապես սկսեն նման բանակցություններ, դրանք կտևեն շատ տարիներ։ Եվ մենք, իհարկե, պետք է նայենք Եվրամիության դինամիկային, թե ինչի է այն վերածվում։ Եվ այստեղ, իհարկե, մենք պետք է նաև վերահսկենք և հետևենք Եվրահանձնաժողովի և Բրյուսելի այսօրվա հայտարարություններին, որոնք կապված են այն փաստի հետ, որ Եվրամիությունը տնտեսական միությունից վերածվում է ռազմաքաղաքական միության։ Սա նույնպես պետք է հաշվի առնել։ Արդյո՞ք հայերը պատրաստ են միանալ ռազմաքաղաքական դաշինքին, որն այժմ շատ ագրեսիվ է տրամադրված Ռուսաստանի Դաշնության նկատմամբ: Ամեն դեպքում, իհարկե, բազմիցս նշվել է, որ այս կամ այն  ինտեգրացիոն միավորման օգտին ընտրությունը միշտ հայ ժողովրդի ընտրությունն է»,- ասել է Օվերչուկը:

Ըստ Ռուսաստանի փոխվարչապետի՝ որոշակի պահի որոշումներ պետք է կայացվեն:

«Ակնհայտ է, որ որևէ որոշում պետք է կայացվի որոշակի պահի, քանի որ սա շատ է քննարկվել թե՛ այստեղ, թե՛ Հայաստանում, Նիկոլ Փաշինյանը խոսել է այդ մասին. բոլորը հասկանում են, որ Հայաստանը չի կարող միաժամանակ լինել երկու ինտեգրացիոն միավորումների անդամ: Հետևաբար, եթե նման ընտրություն երբևէ կատարվի, այն կունենա համալիր բնույթ՝ հաշվի առնելով այն դինամիկան, որը մենք այսօր տեսնում ենք Եվրամիության փոփոխվող բնույթում»,- ասել է նա:

Թարգմանությունը՝ Էմմա Չոբանյանի