Թուրքիայում ձերբակալվել է Ստամբուլի բանտարկված ընդդիմադիր քաղաքապետի ազգականը

Թուրքիայում թմրանյութերի հետ կապված հետաքննության շրջանակում կալանքի որոշում է կայացվել 27 անձի նկատմամբ, հաղորդում է DHA գործակալությունը։ Կասկածյալներից 19-ը կալանավորվել են, գրում է Turkish Minute-ը։

Ձերբակալվածների թվում է , այդ թվում՝ Ստամբուլի բանտարկված քաղաքապետ Էքրեմ Իմամօղլուի կնոջ եղբայրը՝ Ալի Քայան։ DHA-ի փոխանցմամբ՝ կասկածյալները մեղադրվում են անձնական օգտագործման համար թմրանյութեր պահելու և թմրանյութերի օգտագործումը խթանելու մեջ։

Էքրեմ Իմամօղլուի կինը՝ Դիլեք Իմամօղլուն արձագանքել է X-ում՝ կոչ անելով կառավարությանը դադարեցնել իր ընտանիքի թիրախավորումը։

«Սկզբում թիրախավորվեցին իմ ամուսինը՝ Էքրեմ Իմամօղլուն և նրա գործընկերները։ Հետո մեր ընտանիքները»,- գրել է նա՝ հավելելով, որ հարազատներին որպես ճնշման միջոց օգտագործելն անօրինական է, և որ դատական ​​​​գործընթացները պետք է հիմնված լինեն միայն կոնկրետ ապացույցների վրա, իրականացվեն արդար և թափանցիկ։

Թուրքիայի գլխավոր ընդդիմադիր ​​ժողովրդահանրապետական կուսակցության (CHP) գործիչ, 2028 թվականի նախագահի թեկնածու Իմամօղլուն մարտից ի վեր նախնական կալանքի տակ է կոռուպցիայի և «քաղաքական լրտեսության» մեղադրանքներով։ Պաշտոնական առաջադրումից ընդամենը մի քանի ժամ անց նրա ձերբակալությունը հանգեցրեց համազգային բողոքի ցույցերի և լայնորեն դատապարտվեց՝ որակվելով որպես քաղաքական դրդապատճառներով։ Նա պահվում է Ստամբուլի ծայրամասում գտնվող Մարմարա բանտում։

Դիլեք Իմամօղլուի մյուս եղբայրը՝ Ջևաթ Քայան, ձերբակալվել էր անցյալ տարվա ապրիլին։

Հետաքննությունը վերջին ամիսներին Ստամբուլում սկսված թմրանյութերի հետ կապված ավելի լայն գործողությունների շարքի մաս է, որոնցում ավելի ու ավելի շատ են ներգրավվում երաժշտության ոլորտի և լրատվամիջոցների ներկայացուցիչներ։ Հետաքննության նախնական փուլերում նմանատիպ մեղադրանքներով ձերբակալվել կամ կալանավորվել են տասնյակ կասկածյալներ, որոնցից մի քանիսը հետագայում ազատ են արձակվել ցուցմունքներից հետո։

Թարգմանությունը՝ Էմմա Չոբանյանի