23.06.2026 | 00:27
Ամենամեծ էկրանով ստադիոնը, չսպասված երկրպագուներ. ԱԱ-2026-ի Բելգիա-Իրան խաղը` Factor TV-ի աչքերով
Իլոն Մասկը դարձել է առաջին մարդը, ում կարողությունը գերազանցել է 800 միլիարդ դոլարը
Քաղաքականություն
04.02.2026 | 15:42
Իլոն Մասկը դարձել է պատմության մեջ առաջին մարդը, ում կարողությունը գերազանցել է 800 միլիարդ դոլարը, այն բանից հետո, երբ նրա SpaceX-ը ձեռք է բերել արհեստական բանականությամբ և սոցիալական մեդիայով զբաղվող նրա xAI ընկերությունը։ Forbes-ի գնահատմամբ՝ գործարքը, որը միավորված ընկերությունը գնահատում է 1,25 տրիլիոն դոլար, Մասկի կարողությունը մեծացրել է 84 միլիարդ դոլարով՝ հասցնելով ռեկորդային 852 միլիարդ դոլարի։
Գործարքից առաջ Մասկը SpaceX-ում ուներ մոտավորապես 42% բաժնեմաս՝ 336 միլիարդ դոլար արժողությամբ, դեկտեմբերին մեկնարկած մրցույթային առաջարկի հիման վրա, որը մասնավոր հրթիռային արտադրողին գնահատում էր 800 միլիարդ դոլար: Նա նաև xAI-ում ուներ մոտավորապես 49% բաժնեմաս՝ 122 միլիարդ դոլար արժողությամբ: Միաձուլումից հետո, որի արդյունքում SpaceX-ը գնահատվել է 1 տրիլիոն դոլար, իսկ xAI-ը՝ 250 միլիարդ դոլար, Forbes-ը գնահատում է, որ Մասկն այժմ ունի 43% բաժնեմաս միավորված ընկերությունում՝ 542 միլիարդ դոլար արժողությամբ:
Սա SpaceX-ը դարձնում է Մասկի ամենաարժեքավոր ակտիվը։ Նա նաև ունի Tesla-ի 12% բաժնեմաս՝ 178 միլիարդ դոլար արժողությամբ, և Tesla-ի բաժնետոմսերի օպցիոններ՝ ևս 124 միլիարդ դոլար արժողությամբ։ Սա չի ներառում Tesla-ի բաժնետերերի կողմից նոյեմբերին հաստատված ռեկորդային վարձատրության փաթեթը, որը կարող է Մասկին տալ մինչև 1 տրիլիոն դոլար լրացուցիչ բաժնետոմսեր։
Չորս ամսվա ընթացքում Մասկի կարողությունը հասելե է չորս կարևոր նշաձողի։ Հոկտեմբերին նա դարձավ պատմության մեջ առաջին մարդը, որի կարողությունը հասավ 500 միլիարդ դոլարի, այն բանից հետո, երբ Tesla-ի բաժնետոմսերը կտրուկ աճեցին Մասկի՝ Թրամփի օրոք կառավարության արդյունավետության դեպարտամենտից (DOGE) հեռանալուց հետո։
Դեկտեմբերի 15-ին Մասկը դարձավ պատմության մեջ առաջին մարդը, որի կարողությունը հասել էր 600 միլիարդ դոլարի, այն բանից հետո, երբ մասնավոր ներդրողները SpaceX-ը գնահատեցին 800 միլիարդ դոլար։ Չորս օր անց նա դարձավ պատմության մեջ առաջին մարդը, որի կարողությունը հասավ 700 միլիարդ դոլարի՝ այն բանից հետո, երբ Դելավերի Գերագույն դատարանը վերականգնեց Tesla-ի բաժնետոմսերի նրա օպցիոնները, որոնք չեղյալ էին հայտարարվել ստորին դատարանի կողմից 2024 թվականին։
Մասկն այժմ ռեկորդային՝ 578 միլիարդ դոլարով ավելի հարուստ է, քան աշխարհի երկրորդ ամենահարուստ մարդը՝ Google-ի համահիմնադիր Լարի Փեյջը, որի կարողությունը գնահատվում է 281 միլիարդ դոլար։
Թարգմանությունը՝ Էմմա Չոբանյանի
