Անկարայի դատախազությունը հետաքննում է Էփշտեյնի հետ Թուրքիայի ենթադրյալ կապերը. նրա կղզի երեխաների տեղափոխման պնդումների հետքերով

Անկարայի գլխավոր դատախազությունը հետաքննություն է սկսել Թուրքիայից երեխաների՝ ամերիկացի ֆինանսիստ Ջեֆրի Էփշտեյնի կղզի ապօրինի տեղափոխման մեղադրանքների վերաբերյալ, գրում է Bianet-ը։

Հետաքննությունը, ըստ հաղորդումների, սկսվել է դեկտեմբերի 23-ին՝ ընդդիմադիր «Լավ» (İYİ) կուսակցության պատգամավոր Թուրհան Չյոմեզի սոցիալական ցանցերում արված գրառման հիման վրա, որը հղում էր կատարել ԱՄՆ Արդարադատության նախարարության կողմից դեկտեմբերին հրապարակված փաստաթղթերին։

«Այս փաստաթղթերում նշվում է, որ Թուրքիայից երիտասարդ աղջիկներին տարել են բռնության կղզի։ Նաև նշվել է, որ երեխաները դժվարություններ են ունեցել, քանի որ անգլերեն չեն խոսել։ Սա, մեկ բառով, մարդկության դեմ ուղղված սարսափելի հանցագործություն է»,- գրել էր Չյոմեզը։

Դատական ​​աղբյուրներին հղում անելով՝ DW Türkçe-ն հաղորդում է, որ դատախազները ներկայում ուսումնասիրում են վերջերս հրապարակված մոտ երեք միլիոն փաստաթղթերը՝ Թուրքիային վերաբերող բաժինների վերաբերյալ: Նրանք փնտրում են ապացույցներ Էփշտեյնի գործով կասկածյալների և երկրում կատարված հանցագործությունների միջև կապերի վերաբերյալ։

Խոսքը քրեական հայցի մասին է, որը ներկայացվել է 2009 թվականի մայիսին մի հայցվորի կողմից, որը ենթադրաբար ենթարկվել է բռնության Էփշտեյնի կողմից անչափահաս տարիքում։ Հայցվորը, որն իր ինքնությունը պաշտպանելու համար ներկայացել է որպես «Ջեյն Դոու 102», մեղադրում է Էփշտեյնին բազմաթիվ երկրներից, այդ թվում՝ Թուրքիայից, Չեխիայից և այլ ասիական երկրներից անչափահաս աղջիկների տեղափոխման մեջ։

«Նա նրան ապահովել է հարմարություններով, որպեսզի նա միշտ իր հետ լինի, որտեղ էլ որ նա գնա, այդ թվում՝ անչափահաս հայցվորին իր անձնական ինքնաթիռով տեղափոխելիս։ Յուրաքանչյուր անգամ, երբ նրանք ճանապարհորդում էին այս վայրերից մեկը, տեղի էր ունենում սեռական բռնության նույն օրինաչափությունը, հաճախ՝ աշխարհի տարբեր ծայրերից եկած բազմաթիվ ձգտող մոդելների, դերասանուհիների, հայտնիների և/կամ այլ կանանց, այդ թվում՝ անչափահասների հետ։Հասանելի տեղեկությունների համաձայն՝ մեղադրյալը տեղափոխել է անչափահաս աղջիկների Թուրքիայից, Չեխիայից, Ասիայից և շատ այլ երկրներից, որոնցից շատերը անգլերեն չէին խոսում: Հայցվորի խոսքով՝ մեղադրյալի սեռական շահագործումներից հատուկ բացառված միակ կանայք աֆրոամերիկացի կանայք էին»,- ասվում է փաստաթղթում։

Թարգմանությունը՝ Էմմա Չոբանյանի