27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Ուկրաինայի անվտանգության երաշխիքների նախագիծը ներառում է Արևմուտքի ռազմական արձագանքը ՌԴ-ի կողմից հրադադարի խախտմանը. FT
Քաղաքականություն
03.02.2026 | 16:34
Բրիտանական Financial Times-ը, հղում անելով տեղեկացված աղբյուրներին, հաղորդում է, որ Ուկրաինան իր արևմտյան գործընկերների հետ համաձայնության է եկել անվտանգության երաշխիքների նախագծի շուրջ, որը նախատեսում է «կամավորների կոալիցիայի» ռազմական արձագանք Ռուսաստանի կողմից հրադադարի խախտման դեպքում, գրում է BBC-ի ռուսական ծառայությունը։
Աղբյուրները հայտնում են, որ այս ծրագիրը քննարկվել է ուկրաինացի, ամերիկացի և եվրոպացի պաշտոնյաների միջև դեկտեմբերին և հունվարին մի քանի հանդիպումների ժամանակ։ Այն նաև կքննարկվի չորեքշաբթի և հինգշաբթի օրերին Աբու Դաբիում կայանալիք եռակողմ ամերիկա-ուկրաինա-ռուսական բանակցությունների ժամանակ։
Ըստ FT-ի՝ Ռուսաստանի կողմից հրադադարի հնարավոր խախտմանը արևմտյան դաշնակիցների արձագանքը կլինի հետևյալը.
- Պատասխանը կհետևի 24 ժամվա ընթացքում։ Այն պետք է ենթադրի Արևմուտքի դիվանագիտական նախազգուշացում և Ուկրաինայի զինված ուժերի կողմից գործողություններ՝ խախտումը դադարեցնելու համար։
- Եթե ռազմական գործողությունները շարունակվեն դրանից հետո, պետք է սկսվի արձագանքի երկրորդ փուլը։ Այն պետք է ներառի այսպես կոչված «կամավորների կոալիցիայի» ուժերը, որը Ուկրաինայի արևմտյան դաշնակիցների խումբ է, պատրաստ է զորքեր ուղարկել երկիր հրադադարի դեպքում։
- Եթե հրադադարի խախտումը վերաճի ավելի լայնածավալ հարձակման, ապա արևմտյան ուժերի, այդ թվում՝ ԱՄՆ զինված ուժերի կողմից համակարգված արձագանքը պետք է հետևի սրացումից հետո 72 ժամվա ընթացքում։
Հրապարակման մեջ չի նշում, թե ինչպիսին պետք է լինի արևմտյան դաշնակիցների ռազմական արձագանքը կամ արդյոք դա կենթադրի ռուսական զորքերի հետ ուղղակի ռազմական բախում։
Ռուսաստանը բազմիցս առարկել է Ուկրաինայում արևմտյան զորքերի տեղակայմանը։ Նա նաև պատրաստ չէ դադարեցնել ռազմական գործողությունները, եթե Կիևը չհամաձայնի իր զորքերը դուրս բերել ամբողջ Դոնբասից։
Թարգմանությունը՝ Էմմա Չոբանյանի
