02.07.2026 | 16:20
Կալլասը խոստանում է ԵՄ նոր պատժամիջոցներ ՌԴ-ի նկատմամբ՝ Կիևին ռուսական հարվածներից հետո
ՌԴ-ն պատրաստ է սպառազինության սահմանափակումների բացակայության նոր իրականությանը. Ռյաբկով
Քաղաքականություն
03.02.2026 | 15:25
Ռուսաստանը պատրաստ է նոր իրականությանը, որտեղ Ռազմավարական հարձակողական ներուժի կրճատման պայմանագրի ժամկետի լրանալուց հետո զենքի սահմանափակումներ չեն լինի, հայտարարել է ՌԴ փոխարտգործնախարար Սերգեյ Ռյաբկովը։
Նրա խոսքով՝ Մոսկվան նախապես պատրաստվել է այս զարգացմանը և դիտարկել տարբեր սցենարներ, ուստի դրանում ոչ մի անսպասելի բան չկա։
«Սա նոր պահ է, նոր իրականություն։ Մենք պատրաստ ենք դրան։ Մենք հաշվարկել ենք և ենթադրել, որ սա կարող է տեղի ունենալ։ Դրանում ոչ մի անսպասելի բան չկա, և մենք չենք տեսնում որևէ պատճառ՝ չափազանց դրամատիզացնելու այն, ինչ տեղի է ունենում»,- լրագրողներին ասել է Ռյաբկովը։
Ռյաբկովն ընդգծել է, որ նախկին կայունացնող տարրերի կորուստն իրականություն է, և որ կամավորականության դրսևորումները, որոնք մոտենում են քաոսի, ավելի ու ավելի ակնհայտ են դառնում։
«Ռազմավարական հարձակողական զենքի հետագա կրճատման և սահմանափակման միջոցառումների մասին» պայմանագիրը Ռուսաստանի և Միացյալ Նահանգների միջև համաձայնագիր է, որը սահմանում է, թե ինչպես են կողմերը կրճատելու իրենց ռազմավարական հարձակողական զենքերը: Փաստաթուղթը ստորագրվել է 2010 թվականին Պրահայում Դմիտրի Մեդվեդևի և Բարաք Օբամայի կողմից: Այն ուժի մեջ է մտել 2011 թվականի փետրվարի 5-ին, տասը տարի անց այն երկարաձգվել է ևս հինգ տարով՝ առանց հետագա երկարաձգումների։ Պայմանագրի ժամկետը վերջնական լրանում է 2026 թվականի փետրվարի 5-ին:
Թարգմանությունը՝ Էմմա Չոբանյանի
