Ուֆայում աշակերտը կրակ է բացել դպրոցներից մեկում

Ուֆայում տրավմատիկ ատրճանակով զինված դեռահասը կրակ է բացել դպրոցում, հաղորդում են տեղական Ufa1.ru կայքը, ինչպես նաև Mash և Baza տելեգրամ ալիքները, որոնք կապված են ուժերնների հետ, գրում է Meduza-ն։

Baza-ի տեղեկություններով՝ հարձակվողն 9-րդ դասարանի աշակերտ է։ Հարձակումը տեղի է ունեցել թիվ 16 գիմնազիայում։ Ufa1.ru-ն հաղորդում է, որ աշակերտը դպրոց է մտել տրավմատիկ ատրճանակով և կրակ բացել ներսում գտնվողների վրա։ Աղբյուրի հաղորդմամբ՝ մինչ այդ պայթյուն է լսվել։

Ըստ Mash-ի տեղեկությունների՝ հարձակվողն օգտագործել է հրդեհային ազդանշանը՝ ուշադրությունը շեղելու համար, ապա կրակել ուսուցչի վրա: Բաշկորտոստանի առաջին փոխվարչապետ Ուրալ Կիլսենբաևը հայտարարել է, որ միջադեպի հետևանքով զոհեր չկան:

Հանրապետության ղեկավար Ռադի Խաբիրովը հայտնել է, որ վիրավորներ չկան, մինչդեռ Ufa1.ru-ի աղբյուրը հայտնել է երեք վիրավորի մասին:

Բաշկորտոստանի ՆԳՆ-ն հաստատել է հարձակման մասին տեղեկությունը։ Նշվում է, որ 9-րդ դասարանի աշակերտը դպրոց է մտել օդամղիչ զենքով, կրակել ուսուցչի և երեք դասընկերների վրա, ապա հրավառության նյութ պայթեցրել։ Հարձակվողը ձերբակալվել է։

«Осторожно, новости»-ն հաղորդում է, որ դեռահասը հարձակման մասին հայտարարել է իր տելեգրամ ալիքում, որտեղ հրապարակել է իր լուսանկարները՝ զենքով, և գրել բանտ գնալու պատրաստակամության մասին: «112»-ի տվյալներով՝ տուժողը պատմության ուսուցիչն է:

Թարգմանությունը՝ Էմմա Չոբանյանի