02.07.2026 | 20:24
ՔՊ խմբակցության ղեկավարի թեկնածու է ընտրվել Արուսյակ Մանավազյանը. Նիկոլ Փաշինյան. ՏԵՍԱՆՅՈՒԹ
Կրեմլը հաստատել է՝ Աբու Դաբիում փետրվարի 4-5-ը երկրորդ եռակողմ հանդիպումը տեղի կունենա
Քաղաքականություն
02.02.2026 | 14:54
Կրեմլի խոսնակ Դմիտրի Պեսկովը հայտարարել է, որ փետրվարի 1-2-ը նախատեսված Ուկրաինայի, Ռուսաստանի և ԱՄՆ պատվիրակությունների հանդիպումը խաղաղության գործընթացի շուրջ տեղի կունենա փետրվարի 4-5-ին։ Ավելի վաղ Ուկրաինայի նախագահ Վլադիմիր Զելենսկին էր հայտարարել այս ժամկետների մասին, գրում է BBC-ի ռուսական ծառայությունը։
Պեսկովն ասել է, որ ամսաթիվը հետաձգվել է՝ «երեք կողմերի ժամանակացույցերի լրացուցիչ համակարգման» անհրաժեշտության պատճառով։
Հանդիպումը հետաձգվել է, ենթադրաբար, Միացյալ Նահանգների նախաձեռնությամբ։ Երկրորդ փուլից առաջ ԱՄՆ նախագահ Դոնալդ Թրամփը խնդրել էր ՌԴ նախագահ Վլադիմիր Պուտինին՝ մինչև փետրվարի 1-ը ձեռնպահ մնալ Կիևի և շրջակա տարածաշրջանի էներգետիկ օբյեկտների վրա հետագա հարվածներից՝ ուժեղ ցրտերի և նախորդ ռուսական զանգվածային հարձակումների հետևանքների ֆոնին։
Կրեմլի խոսնակը չի մանրամասնել՝ արդյո՞ք էներգետիկ օբյեկտների վրա հարվածների մորատորիումը կերկարաձգվի մինչև բանակցությունների նոր փուլի մեկնարկը։ Նա նաև հայտարարել է, որ Ռուսաստանի ուղղակի ներդրումների հիմնադրամի ղեկավարի, նախագահի հատուկ դեսպան Կիրիլ Դմիտրիևի և ԱՄՆ ներկայացուցիչների միջև անցյալ շաբաթավերջին Մայամիում կայացած բանակցությունները կառուցողական և դրական էին։
«Այստեղ մանրամասներ չեն լինի։ Գնահատականները, ընդհանուր առմամբ, հայեցակարգային են երկու կողմերից՝ Դմիտրիևից և (ԱՄՆ նախագահի հատուկ դեսպան) Ուիթկոֆից։ Սրանք, ընդհանուր առմամբ, բավականին դրական և կառուցողական զրույցներ էին»,- ասել է Պեսկովը՝ պատասխանելով Դմիտրիևի՝ շաբաթավերջին Մայամիում կայացած բանակցությունների մանրամասների և գնահատականի վերաբերյալ հարցին։
Նա հիշեցրել է, որ Դմիտրիևը ղեկավարում է ԱՄՆ-ի հետ տնտեսական համագործակցության աշխատանքային խումբը։
«Իրականում, այս հարցերը հիմնականում գտնվում են իմ գործընկեր Դմիտրիևի իրավասության ներքո»,- ասել է Պեսկովը։
Թարգմանությունը՝ Էմմա Չոբանյանի
