Իրանում ձերբակալվել է «Օսկարի» առաջադրված ֆիլմի սցենարիստը

«Պարզ պատահականություն» ֆիլմի սցենարիստներից Մեհդի Մահմուդյանը ձերբակալվել է Թեհրանում, հաղորդում են Associated Press-ը և The New York Times-ը՝ հղում անելով ԱՄՆ-ում գործող Human Rights Activists News Agency իրավապաշտպան խմբին, գրում է Meduza-ն։

Ֆիլմի պրոդյուսերական թիմի ներկայացուցիչների խոսքով՝ Մահմուդյանը ձերբակալվել է հունվարի 31-ին։ Նրան առաջադրված մեղադրանքներն անհայտ են։ BBC Persian-ի հաղորդմամբ՝ Մահմուդյանը կարողացել է խոսել փաստաբանի հետ և կարճ կապ հաստատել իր ընտանիքի հետ՝ նրանց տեղեկացնելու իր ձերբակալության մասին։ Նրա գտնվելու վայրը չի նշվում։

Հունվարի 28-ին Մահմուդյանն ու ևս 16 մարդ հայտարարություն են ստորագրել, որով դատապարտում են Իրանի գերագույն հոգևոր առաջնորդ այաթոլլա Ալի Խամենեիին բողոքի ցույցերը բռնի ճնշելու համար: AP-ի հաղորդմամբ՝ ձերբակալվել են նաև հայտարարությունը ստորագրած երկու այլ անձինք։

Ֆիլմի ռեժիսոր Ջաֆար Փանահին, որը ներկայում Իրանից դուրս է, Մահմուդյանին սատարող հայտարարություն է տարածել։

«Մեհդի Մահմուդյանը ոչ միայն մարդու իրավունքների պաշտպան է և խղճի բանտարկյալ. նա վկա է, լսող և հազվագյուտ բարոյական կերպար՝ մարդ, որի բացակայությունն անմիջապես զգացվում է թե՛ բանտի պատերի ներսում, թե՛ դրսում»,- ասվում է հայտարարության մեջ։

Իրանցի ռեժիսոր Ջաֆար Փանահիի ֆիլմը համաշխարհային կինովարձույթ է դուրս եկել 2025 թվականի մայիսին․ սա ռեժիսորի առաջին ֆիլմն է  «համակարգի դեմ քարոզչության» համար բանտարկությունից հետո։ Ֆիլմն արգելված է Իրանում։ Ռուսաստանում ֆիլմի թողարկումը նախատեսված էր 2025 թվականի հոկտեմբերի 30-ին, սակայն Մշակույթի նախարարությունը մերժել է տարածման դիմումը՝ «ֆիլմի կողմից օրենքին չհամապատասխանելու պատճառով»։ Ֆիլմը պատմում է իրանցի նախկին քաղբանտարկյալի մասին, որը բախվում է իր տանջողին և որոշում է վրեժ լուծել։

Ֆիլմը Կաննի կինոփառատոնում արժանացել է «Ոսկե արմավենու ճյուղի»: Այն նաև առաջադրվել է երկու «Օսկար» մրցանակի՝ «Լավագույն սցենար» և «Լավագույն օտարալեզու ֆիլմ» անվանակարգերում:

Թարգմանությունը՝ Էմմա Չոբանյանի