18.08.2026 | 16:48
«Փաշինյանը հայերենի հրաշալի իմացություն ունի». Ռուզաննա Երեմյանը՝«կզացնել»,«չոքացնել» խոսույթի մասին․ ՏԵՍԱՆՅՈՒԹ
Հայտնի են «Գրեմմիի» բոլոր հաղթողները․ Բեդ Բաննիի հաղթանակը վերածվել է ICE-ի դեմ բողոքի ակցիայի
Քաղաքականություն
02.02.2026 | 11:14
Լոս Անջելեսում տեղի է ունեցել երաժշտության աշխարհի ամենահեղինակավոր՝ «Գրեմմի» 68-րդ մրցանակաբաշխությունը։ Այս տարի միջոցառումն ավելի քաղաքականացված էր, քան երբևէ. շատ հաղթողներ և հյուրեր իրենց բողոքն են արտահայտել ամերիկյան ներգաղթային ոստիկանության գործողությունների դեմ, որոնք վերջին շաբաթներին կրակել և սպանել են երկու ցուցարարի։ Մրցանակաբաշխության հաղթողների թվում էին ռեփեր Քենդրիկ Լամարը (որն արժանացել է հինգ մրցանակի), ինչպես նաև երգչուհիներ Բիլի Այլիշը և Լեդի Գագան, գրում է BBC-ի ռուսական ծառայությունը։
Պուերտոռիկացի ռեփեր Բեդ Բաննին՝ Bad Bunny (իսկական անունը՝ Բենիտո Անտոնիո Մարտինես Օկասիո) Գրեմմի մրցանակի է արժանացել ամենահեղինակավոր՝ «Տարվա ալբոմ» անվանակարգում։ «Debi Tirar Mas Fotos» ալբոմը լատինաամերիկյան ռեգեթոնի ոճով է։ Սա Գրեմմիի պատմության մեջ առաջին դեպքն է, երբ ամբողջությամբ իսպանալեզու ալբոմն արժանանում է գլխավոր մրցանակին։
Նա իր ելույթում անդրադարձել է Մինեսոտայում ԱՄՆ ներգաղթի և մաքսային վերահսկողության ծառայության գործողությունների հետևանքով սպանության դեպքերին։
«Նախքան Աստծուն շնորհակալություն հայտնելը՝ կասեմ. «Կորչի՛ ICE-ը»»,- հայտարարել է երաժիշտը արարողության սկզբում՝ «Musicá urbana» անվանակարգում ևս մեկ մրցանակ ստանալու ընթացքում։
Հիշեցնենք՝ Մինեսոտայում ծառայողները կրակել և սպանել էին ցուցարարներ Ռենե Նիկոլ Գուդին և Ալեքս Փրետիին: Թրամփի վարչակազմը պնդում է բոլոր անօրինական ներգաղթյալներին արտաքսելու անհրաժեշտությունը, և ICE-ն տարբեր քաղաքներում գործողություններ է իրականացնում նրանց նկատմամբ, ինչին դեմ են շատ ամերիկացիներ։
«Մենք բարբարոսներ չենք, մենք կենդանիներ չենք, մենք օտարերկրացիներ չենք, մենք մարդիկ ենք և մենք ամերիկացիներ ենք»,- հայտարարել է Բեդ Բաննին։
Արարողության մասնակիցներից շատերն այդ պահին ոտքի են կանգնել՝ ի պաշտպանություն նրա խոսքերի:
Երգչուհի Բիլլի Այլիշը, որը «Գրեմմի» մրցանակի է արժանացել «Լավագույն երգ» անվանակարգում («Wildflower» երգի համար), նույնպես բողոքի կոչեր է հնչեցրել։
«Իսկապես, դժվար է իմանալ՝ ինչ ասել և ինչ անել հենց հիմա։ Եվ ես կարծում եմ, որ մենք պարզապես պետք է շարունակենք պայքարել, շարունակել խոսել և շարունակել բողոքել։ Մեր ձայներն իսկապես կարևոր են, իսկ մարդիկ նշանակություն ունեն»,-ասել է նա։
Այս տարվա Գրեմմիի տրիումֆատորը 38-ամյա ռեփեր Քենդրիկ Լամարն էր, որն ինը անվանակարգերից հինգում մրցանակի է արժանացել։ Այսպիսով, նա դարձել է ամենաշատ Գրեմմի ունեցող ռեփ արտիստը՝ գերազանցելով Ջեյ Զիին՝ 28 մրցանակ։
Լեդի Գագան Գրեմմի մրցանակի է արժանացել «Լավագույն փոփ վոկալ ալբոմ» («Mayhem»), «Լավագույն պարային ձայնագրություն» («Abracadabra») և «Լավագույն ռեմիքս» անվանակարգերում։ Իր ելույթում երգչուհին կոչ է արել կին երաժիշտներին պաշտպանել սեփական ստեղծագործական տեսլականը։
«Գիտեմ, որ երբեմն, երբ մտնում ես տղամարդկանցով լի ստուդիա, դա կարող է դժվար լինել։ Բայց ես խրախուսում եմ ձեզ՝ պայքարել ձեր երգերի համար, պայքարել ինքներդ ձեզ համար որպես պրոդյուսեր։ Եվ անել այնպես, որ ձեզ լսեն»,- ասել է նա։
Թարգմանությունը՝ Էմմա Չոբանյանի
