Հնդկաստանը նավթ կգնի Վենեսուելայից, ոչ թե Իրանից․ Թրամփ

Հնդկաստանը իրանական նավթի փոխարեն կգնի վենեսուելական նավթ․ այս մասին հայտարարել է ԱՄՆ նախագահ Դոնալդ Թրամփը։

«Մենք արդեն ավարտել ենք այս գործարքը, գործարքի հայեցակարգը»,-ասել է նա Air Force One ինքնաթիռում ելույթի ժամանակ՝ Ֆլորիդայից Վաշինգտոն ուղևորվելիս։

Թրամփի այս հայտարարությունը հնչել է մեկ օր անց այն բանից հետո, երբ Վաշինգտոնը Նյու Դելիին տեղեկացրել է, որ շուտով հնարավոր կլինի վերսկսել վենեսուելական նավթի գնումները, Reuters-ին հայտնել են երեք իրազեկ աղբյուրներ։ Գործակալության տվյալներով՝ այս քայլը, ի թիվս այլնի, նպատակ ունի օգնել Հնդկաստանին փոխարինել Ռուսաստանից նավթի ներմուծումը։

Շաբաթ օրը Թրամփը նաև հայտարարել է, որ Չինաստանը կարող է ԱՄՆ-ի հետ գործարք կնքել՝ վենեսուելական նավթ գնելու համար։

Վենեսուելական նավթի վաճառքի վերսկսմանը նախորդել է ԱՄՆ ռազմական գործողությունը, որի ընթացքում հունվարի սկզբին ձերբակալվել է Վենեսուելայի նախկին ղեկավար Նիկոլաս Մադուրոն։ Ամերիկյան վերահսկողության ներքո արտահանման վերականգնումից հետո, աղբյուրների փոխանցմամբ, Վենեսուելայի պետական նավթագազային ընկերությունը՝ PDVSA-ն, սկսել է ավելացնել արդյունահանումը։

ԱՄՆ-ն արդեն սկսել է վենեսուելական նավթի վաճառքը Կարակասի հետ նոր համաձայնագրի շրջանակում։ Առաջին գործարքներից ստացված մոտ 500 միլիոն դոլարի եկամուտները մուտք են արվել ԱՄՆ վարչակազմի վերահսկողության տակ գտնվող բանկային հաշիվներ, հայտնել է իրավիճակին ծանոթ աղբյուրը։ Գործարքի ընդհանուր ծավալը գնահատվում է 2 միլիարդ դոլար, իսկ հիմնական հաշիվը, ըստ աղբյուրի, բացված է Կատարում՝ որպես հաշվարկների համար չեզոք հարթակ։

Հունվարի 29-ին Վենեսուելայի խորհրդարանը, ԱՄՆ պահանջներին համապատասխան, ընդունել է օրենք՝ նավթային ոլորտը մասնավոր ներդրողների համար բացելու մասին։