Քաղաքականություն
28.01.2026 | 16:39
Թուրքիայի արտաքին գործերի նախարար Հաքան Ֆիդանը զգուշացրել է՝ Միացյալ Նահանգների կողմից Իրանի վրա հարձակումը «սխալ» կլինի։ Նա կոչ է արել Վաշինգտոնին և Թեհրանին՝ իրենց խնդիրները լուծել դիվանագիտորեն և աստիճանաբար։ Al Jazeera-ի հետ զրույցում Ֆիդանը տարածաշրջանային համագործակցության կոչ է արել, քանի որ ԱՄՆ-ը ռազմական ակտիվներ է կուտակում Մերձավոր Արևելքում՝ Իրանի հետ լարվածության աճի ֆոնին։
«Սխալ էնորից պատերազմ սկսել»,- ասել է Ֆիդանը։
Չնայած սրվող հռետորաբանությանը՝ Ֆիդանը ենթադրում է, որ դիվանագիտական լուծումը դեռևս հնարավոր է։
«Իրանը պատրաստ է կրկին բանակցել միջուկային գործի շուրջ»,- ասել է թուրք բարձրաստիճան դիվանագետը։
Այն բանից հետո, երբ Իսրայելը հունիսին պատերազմ սկսեց՝ ռմբակոծելով Իրանը, ԱՄՆ-ը հարվածեց Իրանի երեք հիմնական միջուկային օբյեկտներին։ Թրամփը բազմիցս պնդել է, որ հարձակումը «ոչնչացրել է» Իրանի միջուկային ծրագիրը։ Սակայն Թեհրանը պնդում է միջուկային հարստացման իր իրավունքի հարցում, և երկրի բարձր հարստացված ուրանի գտնվելու վայրը մնում է անհայտ։
Միջուկային ծրագրից զատ՝ ԱՄՆ պաշտոնյաները նաև ասել են, որ Իրանը պետք է կրճատի իր հրթիռային զինանոցը և դադարեցնի տարածաշրջանում դաշնակից ոչ պետական դերակատարներին աջակցելը, ինչպիսիք են Լիբանանում «Հըզբոլլահ»-ը և Գազայում ՀԱՄԱՍ-ը։
«Իմ խորհուրդը միշտ ամերիկացի ընկերներին է՝ մեկ առ մեկ փակեք հարցերը Իրանի հետ։ Սկսեք միջուկայինից, փակեք այն, ապա մյուսները։ Եթե դրանք բոլորը միասին դնենք, մեր իրանցի ընկերների համար շատ դժվար կլինի մարսել, իսկապես մշակել և անցնել այս ամենի միջով։ Եվ երբեմն դա կարող է նվաստացուցիչ թվալ նրանց համար։ Շատ դժվար կլինի բացատրել ոչ միայն իրենց, այլև ղեկավարությանը»,- ասել է նա։
Թուրք պաշտոնյան նաև նշել է, որ Իրանը կարող է «իդեալական տեղ» զբաղեցնել տարածաշրջանային կարգում։
«Նրանք պետք է վստահություն ստեղծեն տարածաշրջանում։ Պետք է ուշադրություն դարձնեն, թե ինչպես են իրենց ընկալում տարածաշրջանային երկրները, քանի որ նրանք ոչ մի տեղ չեն գնում. մենք ոչ մի տեղ չենք գնում»,- հավելել է նա։
Ըստ Ֆիդանի՝ չնայած տարբեր գաղափարախոսություններին, հայացքներին, կրոնին՝ տարածաշրջանի երկրները պետք է համագործակցեն և միասին աշխատեն ազգային պետության համակարգի շրջանակում։
Թարգմանությունը՝ Էմմա Չոբանյանի
