03.04.2026 | 21:43
Ապրիլի 6-ին Հայաստանի մի շարք հասցեներում էլեկտրաէներգիայի անջատումներ կլինեն
Սիրիայի նախագահը Մոսկվա է ժամանել՝ Պուտինի հետ բանակցությունների
Քաղաքականություն
28.01.2026 | 15:33
Սիրիայի անցումային նախագահ Ահմեդ ալ-Շարաան ժամանել է Մոսկվա՝ «Վնուկովո-2» օդանավակայան, գրում է Ինտերֆաքսը։ Կրեմլում նախատեսված են նրա բանակցությունները Ռուսաստանի նախագահ Վլադիմիր Պուտինի հետ։
Բանակցությունների օրակարգում ներառված են բազմաթիվ հարցեր, այդ թվում՝ տնտեսական համագործակցությանը վերաբերող, հայտնել է Պուտինի մամուլի քարտուղար Դմիտրի Պեսկովը։
«Ռուս-սիրիական բանակցություններ կլինեն աշխատանքային նախաճաշի ձևաչափով։ Կլինի նաև առանձին զրույց նախագահի և պարոն ալ-Շարաայի միջև։ Օրակարգում ներառված են երկկողմ համագործակցությանը վերաբերող բազմաթիվ հարցեր, հիմնականում՝ տնտեսական ոլորտի։ Կլինի նաև կարծիքների փոխանակում տարածաշրջանում ստեղծված իրավիճակի վերաբերյալ, հատկապես, որ քննարկելու շատ բան կա»,- ասել է Պեսկովը։
Նա նշել է, որ Սիրիայի հետ հարաբերություններն «ակտիվորեն զարգանում են»։
«Երկրում ղեկավարության փոփոխությունից հետո մենք անցյալ տարի անցկացրինք միջկառավարական խառը հանձնաժողովի առանձին նիստ՝ պարոն ալ-Շարաայի Մոսկվա կատարած նախորդ այցից հետո։ Ինչ վերաբերում է մեր զինված ուժերի տեղակայմանը Սիրիայում, սա կրկին ՊՆ իրավասությունն է, և մենք խորհուրդ ենք տալիս այս հարցը քննարկել այնտեղ։ Այնուամենայնիվ, ես կասկած չունեմ, որ Սիրիայում մեր զորքերի ներկայության հետ կապված բոլոր հարցերը նույնպես կբարձրացվեն այսօրվա բանակցությունների ժամանակ»,- ասել է Կրեմլի խոսնակը՝ պատասխանելով հարցի՝ արդյո՞ք կարող է հաստատել ռուսական զորքերի դուրսբերման մեկնարկը Սիրիայի Ղամիշլիի ավիաբազայից։
Պեսկովին նաև խնդրել են մեկնաբանել տեղեկությունները, որ Սիրիայի նոր իշխանությունները բանակցություններ են վարում Սիրիայի նախկին նախագահ Բաշար ալ-Ասադի արտահանձնման շուրջ:
«Մենք չենք մեկնաբանում Ասադի թեման», – պատասխանել է նա:
Սիրիայի անցումային նախագահն առաջին անգամ Մոսկվա այցելել էր 2025 թվականի հոկտեմբերի 15-ին։ Սա ռուս-սիրիական առաջին բարձր մակարդակի գագաթնաժողովն էր Դամասկոսում իշխանափոխությունից հետո։
Թարգմանությունը՝ Էմմա Չոբանյանի
