18.08.2026 | 17:41
Հայտնի է «Ուժեղ Հայաստանի»՝ Եվրաինտեգրման հարցերի մշտական հանձնաժողովի նախագահի թեկնածուի անունը
Թուրքիայում Իրանի լրտեսական ցանց է բացահայտվել. 6 անձ ձերբակալվել է
Քաղաքականություն
28.01.2026 | 16:59
Թուրքիայի Ազգային հետախուզական կազմակերպության (MİT) և ոստիկանության համատեղ գործողության միջոցով Իրանի հետախուզության անունից գործող և Ինջիրլիքի ավիաբազան թիրախավորող բջիջ է վերացվել, գրում է թուրքական Sabah-ը։
Նշվում է, որ հինգ նահանգներում, որոնց կենտրոնը Ստամբուլն էր, գործողությունների ընթացքում ձերբակալվել են պաշտպանական արդյունաբերության ընկերությունների սեփականատերեր Էրհան Էրգելենը և Թաներ Օզջանը, տեքստիլ արտադրողներ Ջեմալ Բեյազը, Ռեմզի Բեյազը, Ալիջան Քոչը և Իրանի քաղաքացի Աշքան Ջալալին։ Ստամբուլի քրեական դատարանը բոլոր վեց անձանց կալանավորել է՝ «քաղաքական կամ ռազմական լրտեսության նպատակով պետական գաղտնիքներ ձեռք բերելու» մեղադրանքով։
Հետաքննությունը պարզել է, որ խումբը գլխավորել են Իրանի հետախուզության աշխատակիցներ Նաջաֆ Ռոստամին («Հաջի») և Մահդի Յեքեհ Դեհղանը («Բժիշկ»): Պարզվել է, որ Ռոստամին Վանում բնակվող Ալիջան Քոչին հանձնարարել է Ադանայի Ինջիրլիքի ավիաբազայում լուսանկարներ և տեսանյութեր անելու համար անձանց գտնել:
Պարզվել է, որ Անկարայում բնակվող իրանցի Աշքան Ջալալին ծրագրել է իր «Bulaq Robotics» և «Arete Industries» ընկերությունների միջոցով Թուրքիայից անօդաչու թռչող սարքեր տեղափոխել ինքնահռչակ Հյուսիսային Կիպրոսի թուրքական հանրապետություն և Կիպրոս։ Պարզվել է նաև, որ Ջալալին և Քոչը 2025 թվականի օգոստոս-սեպտեմբերին Իրանում մասնակցել են անօդաչու թռչող սարքերի օգտագործման հատուկ վարժանքների։
Պարզվել է, որ Էրհան Էրգելենը և Թաներ Օզջանը 2025 թվականի հոկտեմբերին մեկնել են Իրան և մասնակցել Կիպրոս անօդաչուների առաքմանը: Ռեմզի Բեյազն իր ցուցմունքում նշել է, որ ստացել է այլախոհների մահապատիժներ իրականացնելու առաջարկ: Պարզվել է, որ ցանցն իր գործունեությունը ֆինանսավորել է անօդաչու թռչող սարքերի առևտրի քողի տակ:
Թարգմանությունը՝ Էմմա Չոբանյանի
