Թրամփն ու Էրդողանը հեռախոսազրույց են ունեցել

Թուրքիայի նախագահ Ռեջեփ Թայիփ Էրդողանը և ԱՄՆ նախագահ Դոնալդ Թրամփը հեռախոսազրույց են ունեցել՝ փորձելով համաձայնեցնել իրենց ռազմավարությունները Գազայի հետպատերազմյան կառավարման և Սիրիայում անկայուն անցումային փուլի վերաբերյալ։ Turkiye today-ը գրում է, որ այս քննարկումը նշանավորում է Անկարայի և Վաշինգտոնի տարածաշրջանային առաջնահերթությունները համաձայնեցնելու նշանակալի ջանքերը, իսկ Էրդողանը հայտարարել է պաշտպանական արդյունաբերության ոլորտում համագործակցությունը խորացնելու պատրաստակամության մասին։

Ըստ Թուրքիայի նախագահականի հաղորդագրության՝ զրույցը կենտրոնացած էր Գազայի վարչակազմի համար Թրամփի գլխավորած «Խաղաղության խորհրդի» գործառնական հաջողության վրա։ Էրդողանը խորհրդի առաքելությունը ներկայացրել է որպես տարածաշրջանային կայունության նախապայման՝ ընդգծելով, որ անկլավում «մարդասիրական աղետը» պետք է լուծվի՝ վերակառուցման համար ճանապարհ բացելով։

Էրդողանը ընդգծել է Անկարայի «մեծ կարևորությունը» սիրիական ճակատում հրադադարի և ինտեգրման համաձայնագրերի լիարժեք կատարման հարցում։ Նա նշել է, որ թուրքական հետախուզական և դիվանագիտական ​​​​խողովակներն «ուշադիր հետևում են» գործընթացին՝ համագործակցելով ինչպես ԱՄՆ պաշտոնյաների, այնպես էլ Դամասկոսի իշխանությունների հետ։

Հաղորդագրության համաձայն՝ երկու առաջնորդները քննարկել են երկկողմ հարաբերությունները, մասնավորապես, պաշտպանական արդյունաբերության ոլորտում, Էրդողանը շեշտել է Թուրքիայի մտադրությունը՝ «հարաբերությունները զարգացնել բոլոր ոլորտներում»։

Մինչ քննարկման ընթացքում պաշտոնապես առաջնահերթություն է տրվել տարածաշրջանային հրադադարներին և «Խաղաղության խորհրդին», պաշտպանական արդյունաբերության համագործակցության ներառումն ընդգծում է Էրդողանի հույսը, որ Թրամփի գործարքային դիվանագիտությունը վերջապես կլուծի F-16-ի արդիականացման խոչընդոտը և գնված F-35-ների սառեցված կարգավիճակը, ասվում է հրապարակման մեջ։

Թարգմանությունը՝ Էմմա Չոբանյանի