27.01.2026 | 22:48
Արարատյան դաշտի հարակից ճանապարհներին խիտ մառախուղ է․ Ճանապարհային դեպարտամենտ
Ուկրաինայի նախկին վարչապետ Յուլիա Տիմոշենկոն Ռուսաստանում հեռակա կարգով կալանավորվել է
Քաղաքականություն
27.01.2026 | 21:45
Ռուսաստանում Ուկրաինայի նախկին վարչապետ, «Բատկիվշչինա» կուսակցության առաջնորդ Յուլիա Տիմոշենկոն հեռակա կարգով կալանավորվել է ռազմական «կեղծիքների» գործով (Քրեական օրենսգրքի 207.3 հոդվածի 2-րդ մասի «գ» և «դ» կետեր)։ Current time-ի հաղորդմամբ՝ այս մասին հայտնել է Ռուսաստանի գլխավոր դատախազությունը:
Քննության տվյալներով՝ Տիմոշենկոն, «ռուս զինծառայողների նկատմամբ քաղաքական և գաղափարական ատելությունից և թշնամանքից մղված, պատրաստել և իր սոցիալական ցանցերի էջում տեղադրել է մի հրապարակում, որը պարունակել է միտումնավոր կեղծ տեղեկություններ Բուչա և Իրպին քաղաքներում խաղաղ բնակիչների սպանություններին Ռուսաստանի զինված ուժերի անձնակազմի ներգրավվածության մասին»։
2024 թվականի հուլիսին Ռուսաստանի իշխանությունները Տիմոշենկոյի նկատմամբ հայտարարել էին միջազգային հետախուզում։
Միաժամանակ, Ուկրաինայում Տիմոշենկոն կասկածվում է Գերագույն ռադայի մի քանի պատգամավորներին «անօրինական արտոնություններ» առաջարկելու կամ տրամադրելու մեջ՝ որոշակի օրինագծերի օգտին կամ դեմ քվեարկելու դիմաց (Քրեական օրենսգրքի 369-րդ հոդվածի 4-րդ մասը):
Քաղաքական գործիչը գործն անվանել է «զուտ քաղաքական» և հերքել մեղադրանքները: Անցյալ շաբաթ նրա ազատ արձակման համար վճարվել է ամբողջ գրավը՝ ավելի քան 33 միլիոն գրիվնա (ավելի քան 760,000 դոլար):
Թարգմանությունը՝ Էմմա Չոբանյանի
