Բաքուն ՌԴ լրատվամիջոցին մեղադրում է Ադրբեջանի և Թուրքիայի դաշնակցային հարաբերությունների դեմ ապատեղեկատվական արշավի համար

Ադրբեջանի լրատվամիջոցների զարգացման գործակալությունը (MEDIA) հայտարարություն է տարածել Ադրբեջանի և Թուրքիայի միջև ռազմավարական դաշնակցությունը թիրախավորող ապատեղեկատվության վերաբերյալ։ Նշվում է, որ «մի շարք արտասահմանյան առցանց լրատվական ալիքներ և սոցիալական ցանցեր տարածում են կասկածելի ծագում ունեցող ապատեղեկատվություն», որը «չի արտացոլում իրականությունը և նպատակ ունի վնասել Ադրբեջանի և Թուրքիայի միջև ռազմավարական դաշինքին»։

Նախնական հետաքննության արդյունքում պարզվել է, որ այս ապատեղեկատվական արշավը սկիզբ է առել ինտերնետի ռուսալեզու հատվածից և ծագել է Tsargrad.tv ռեսուրսից։

«Մենք խստորեն դատապարտում ենք մեր երկրի դեմ ուղղված նման ապատեղեկատվության տարածումը, որը նպատակ ունի կեղծ և մանիպուլյատիվ բովանդակության միջոցով մոլորեցնել հասարակական կարծիքը, ինչպես նաև խաթարել Ադրբեջանի և Թուրքիայի միջև եղբայրական և դաշնակցային հարաբերությունները, և ընդգծում ենք դրա անընդունելիությունը։ Մենք կոչ ենք անում Ադրբեջանի և Թուրքիայի լրագրողներին և լրատվամիջոցներին՝ սկզբունքային դիրքորոշում ցուցաբերել նման ապատեղեկատվության փորձերի դեմ, զերծ մնալ չստուգված տեղեկատվության տարածումից և պատասխանատու կերպով պաշտպանել տեղեկատվական տարածքը»,- ասվում է հայտարարության մեջ։

Միաժամանակ, կոչ է արվում երկու երկրների հանրությանը՝ «չհավատալ կեղծ լուրերին և առաջնորդվել միայն պաշտոնական մարմինների հայտարարություններով»։

Թարգմանությունը՝ Էմմա Չոբանյանի