27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
ԱՄՆ-ը կարող է հարվածել Իրանի բարձրաստիճան պաշտոնյաներին արդեն այս շաբաթ. MEE
Քաղաքականություն
27.01.2026 | 15:35
ԱՄՆ-ը քննարկում է իրանցի «բարձրարժեք» պաշտոնյաներին և հրամանատարներին ճշգրիտ հարվածներ հասցնելու հարցը, որոնց պատասխանատու է համարում ցուցարարների մահվան համար, Middle East Eye-ին ասել է քննարկումներին ծանոթ Պարսից ծոցի մի պաշտոնյա։ Հարվածները կարող են տեղի ունենալ արդեն այս շաբաթ, սակայն ժամանակացույցը կարող է փոխվել, հայտնել են MEE-ին։
Վարչակազմի ներսում քննարկումները բնութագրվել են որպես «քաոսային», որտեղ բանավեճեր են ծավալվել այն մասին, թե ինչ հետևանքներ կունենան Իրանի կողմից ձեռնարկվող հակահարվածները։
ԱՄՆ նախագահ Դոնալդ Թրամփի վարչակազմը գրեթե մեկ ամիս է՝ մտածում է Իրանին հարված հասցնելու մասին՝ ցուցարարների նկատմամբ դաժան ճնշումների պատրվակով, որի արդյունքում կառավարական անվտանգության ուժերը հազարավոր մարդկանց զոհ դարձան։ Ցուցարարներին կառավարական հաստատությունները «գրավելու» կոչ անելուց հետո Թրամփը նահանջեց և հայտարարեց, որ «սպանությունները դադարեցվել են»։ Թրամփի որոշումը լարվածությունը թուլացնելու վերաբերյալ տեղի ունեցավ Պարսից ծոցի երկրների, մասնավորապես, Սաուդյան Արաբիայի, Կատարի և Օմանի կողմից հարվածների դեմ լինելու ֆոնին։
Մինչ որոշ հաղորդագրություններ Թրամփի հայտարարությունները ներկայացնում էին որպես ամերիկյան միջամտության ավարտ, ԱՄՆ նախկին պաշտոնյաներն ու վերլուծաբանները MEE-ին ասել են, որ դրանք, կարծես, դադարի ազդանշան են։
ԱՄՆ հետախուզության նախկին պաշտոնյան MEE-ին ասել է, թե վարչակազմի ներսում տեղի ունեցած զրույցները ցույց են տալիս, որ Թրամփը չի հրաժարվել Թեհրանում «ռեժիմի փոփոխության» իր ձգտումից։
Ավելի վաղ Թրամփը Axios-ին տված հարցազրույցում հայտարարել էր, որ Թեհրանը հետաքրքրված է Միացյալ Նահանգների հետ իր վեճերի դիվանագիտական լուծմամբ։ Միևնույն ժամանակ, ամերիկացի առաջնորդը ընդգծել է, որ ինքը զգալի ուժեր է կուտակել Իրանի մոտակայքում։
Թարգմանությունը՝ Էմմա Չոբանյանի
