Գիտնականներ ունենք, որոնք շատ նման են Ազգային ժողովի կոճակ սեղմող պատգամավորներին. Հրանուշ Խառատյան

ՀՀ կրթության և գիտության փոխնախարար Հովհաննես Հովհաննիսյանը գիտության ոլորտում հեղափոխական քայլեր անելու կողմնակից չէ, իսկ թե ինչո՞ւ են գիտնականների աշխատավարձերը ցածր՝ խորհուրդ է տալիս գտնել դրանց պատճառները։

«Աշխատավարձերը բավականին ցածր են, սակայն պետք է հասկանալ նաև էֆեկտիվության մակարդակը․ կան մարդիկ, որոնք գալիս են աշխատանքի սուրճ խմելու համար, հետո բողոքում են ցածր աշխատավարձից․ այսինքն՝ նրանք, ովքեր էֆեկտիվ են աշխատում, պետք է բարձր աշխատավարձ ստանան»,- այսօր «Ինչպե՞ս բարձրացնել գիտության արդյունավետությունը» թեմայով քննարկման ժամանակ ասաց փոխնախարարը։

Խոսելով  գիտությանը հատկացվող միջոցների ոչ արդյունավետ ծախսերի մասին՝ փոխնախարարը նշեց, որ խորքային հետազոտություն են փորձում իրականացնել՝ հասկանալու համար, թե բուհերին, ինստիտուտներին հատկացված միջոցները որքանո՞վ են արդյունավետ բաշխվել, ուսումնասիրության արդյունքները կամփոփովեն և կներկայացվեն հանրային քննարկման։

«Պետք է պատրաստ լինել գնալ ցավոտ լուծումների, մենք հասկանում ենք, որ իրականացված ուսումնասիրությունների արդյունքներն ու դրանց վերաբերյալ կայացված որոշումները ոչ բոլորի սրտով են լինելու, սակայն կրկնում եմ՝ պետք է գնալ նման ռեֆորմների»։

Քննարկման մասնակից ՀՀ ԳԱԱ հնագիտության և ազգագրության ինստիտուտի առաջատար գիտաշխատող, պատմական գիտությունների թեկնածու Հրանուշ Խառատյանն էլ խնդրի վերաբերյալ հավելեց, որ, ցավոք սրտի, գիտության ոլոտում էլ մենք այսօր ունենք գիտնականներ, որոնք շատ նման են Ազգային ժողովի կոճակ սեղմող պատգամավորներին։

«Ակադեմիա են գալիս ընդամենը «կոճակ սեղմելու» համար, պաշտպանել են ատենախոսություններ, բայց դրանց մասին որևէ տեղեկություն չունեն, և ցավալի է, որ նման մարդիկ ընդգրկված են հատկապես գիտական խորհուրդներում»,- ասաց Խառատյանը։