«Դա մեր տարածքն է». Թրամփը` Գրենլանդիայի մասին

ԱՄՆ նախագահ Դոնալդ Թրամփը պնդում է Գրենլանդիան Միացյալ Նահանգների կողմից ձեռք բերելու վերաբերյալ բանակցությունների անհապաղ մեկնարկի հարցում։ Նա այս հայտարարությունն արել է Դավոսում Համաշխարհային տնտեսական ֆորումում ունեցած ելույթում, գրում է Meduza-ն։

Թրամփը քննադատել է Դանիային՝ այն անվանելով չափազանց թույլ Գրենլանդիան պաշտպանելու համար։ Նա կրկնել է իր հիմնական թեզը, որ Միացյալ Նահանգներին Գրենլանդիան անհրաժեշտ է «ազգային անվտանգության և միջազգային անվտանգության» համար։

«Այս հսկայական, անպաշտպան կղզին իրականում Հյուսիսային Ամերիկայի մի մասն է։ Դա մեր տարածքն է»,- հավելել է  Թրամփը։

Նա նաև պնդել է, որ Միացյալ Նահանգները «հիմարություն» է գործել՝ Երկրորդ համաշխարհային պատերազմից հետո կղզին Դանիային վերադարձնելով։

ԱՄՆ նախագահը նշել է, որ ուժ չի կիրառի «այդ մեծ, գեղեցիկ սառցե կտորը» ստանալու համար։

«Մենք երբեք ոչինչ չենք խնդրել և երբեք ոչինչ չենք ստացել։ Հավանաբար, ոչինչ չենք ստանա, եթե ես չորոշեմ չափազանց ուժ և բռնություն կիրառել։ Բայց ես դա չեմ անի»,- հավելել է Թրամփը։

ԱՄՆ առաջնորդի խոսքով՝ Գրենլանդիան Միացյալ Նահանգներին միացնելու իր առաջարկը սպառնալիք չի լինի ՆԱՏՕ-ի համար։

«Դա զգալիորեն կամրապնդի ամբողջ դաշինքի, ՆԱՏՕ-ի դաշինքի անվտանգությունը։ Այն, ինչը խնդրում ենք, Գրենլանդիան ստանալն է, այդ թվում՝ սեփականությունը։ Որովհետև այն պաշտպանելու համար անհրաժեշտ է սեփականություն։ Դուք չեք կարող այն պաշտպանել վարձակալության պայմաններում»,- հայտարարել է Թրամփը։

Թարգմանությունը՝ Էմմա Չոբանյանի