21.01.2026 | 19:35
Պետք է պատասխան տրվի Արշակ Սրբազանին վերագրվող սկանդալին․ Գևորգ եպիսկոպոս Սարոյան. ՏԵՍԱՆՅՈՒԹ
Մարդասիրական աղետ է՝ հունվարին Կիևը 600,000 մարդ է լքել. Կլիչկո
Քաղաքականություն
21.01.2026 | 18:05
Կիևի քաղաքապետ Վիտալի Կլիչկոն հայտարարել է, որ հունվարին Ուկրաինայի մայրաքաղաքը, որտեղ ապրում է ավելի քան 3 միլիոն մարդ, լքել է 600,000 բնակիչ։ Նա այս մասին ասել է The Times-ին, փոխանցում է Current time-ը։
Կլիչկոյի մամուլի ծառայությունը «Ուկրաինսկա պրավդա»-ին բացատրել է, որ Կիևի իշխանություններն այս եզրակացությանն են հանգել՝ հիմնվելով հաշվարկային տվյալների վրա. քաղաքում ներկայում 600,000-ով պակաս «քնած» հեռախոս կա։
«Այստեղից էլ քաղաքապետի կողմից բարձրաձայնված թիվը։ Օրինակ՝ նրանք հաշվարկել են, թե պատերազմի սկզբում քանի մարդ է մնացել քաղաքում (800,000)։ Ոմանք հետևել են խորհրդին և, ունենալով այլ տարբերակներ, հեռացել են քաղաքից։ Բացի այդ, դպրոցական արձակուրդները երկարաձգվել են։ Ուսանողները նաև առցանց են սովորում, և նրանցից մի քանիսը, ովքեր Կիևից չեն, հեռացել են»,- պարզաբանել են քաղաքապետարանից։
The Times-ին տված մեկնաբանությունում Կլիչկոն պնդել է, որ ՌԴ նախագահ Վլադիմիր Պուտինը Կիևը տանում է դեպի «մարդասիրական աղետ»։ Նա հայտնել է, որ մայրաքաղաքում 4,000 բազմահարկ շենքեր ներկայում առանց ջեռուցման են, այն վերականգնվել է ավելի քան 1600 շենքում։
«Իրավիճակը բարդ է, քանի որ այս շենքերի մեծ մասը ջեռուցմանը միացվում է երկրորդ անգամ՝ հունվարի 9-ին կարևորագույն ենթակառուցվածքների վնասվելուց ի վեր։ Կոմունալ և էներգետիկ ընկերությունները շարունակում են աշխատանքները Կիևի բնակիչների տներում ջեռուցման, ջրի և էլեկտրաէներգիայի վերականգնման ուղղությամբ»,- նշել է Կիևի քաղաքապետը։
Վիտալի Կլիչկոն խորհուրդ է տվել բնակիչներին՝ «հնարավորության դեպքում լքել քաղաքը», մինչ արտակարգ ծառայությունները փորձում են վերականգնել Կիևի էլեկտրաէներգիան։
Ըստ Ուկրաինայի էներգետիկայի նախարարության՝ հունվարի լույս 21-ի գիշերը ռուսական հարձակումների հետևանքով Օդեսայի, Դնեպրոպետրովսկի, Խարկովի և Զապորոժիեի մարզերում էլեկտրաէներգիայի անջատում է եղել։ Կիևում և Կիևի մարզում իրավիճակը, ըստ որոշ տեղեկությունների, շարունակում է մնալ մարտահրավերային՝ սառնամանիքի հետևանքով առաջացած լրացուցիչ ծանրաբեռնվածության պատճառով։
Խարկովի մարզային վարչակազմի ղեկավար Օլեգ Սինեգուբովն ավելի վաղ ճեպազրույցի ժամանակ հայտնել էր, որ հունվարի 20-ին առանց էլեկտրաէներգիայի է մնացել 1,1 միլիոն բաժանորդ, որը կազմում է Խարկովի և Խարկովի մարզի բնակչության շուրջ 90%-ը: Հունվարի 21-ի առավոտյան 460,000 բաժանորդ է առանց էլեկտրաէներգիայի եղել: Նա հայտարարել է, որ իշխանությունները պատրաստվում են «վատագույն սցենարին»:
Թարգմանությունը՝ Էմմա Չոբանյանի
