Մոլդովան սկսել է ԱՊՀ-ից դուրս գալու գործընթացը

Մոլդովայի Հանրապետությունը սկսել է Անկախ պետությունների համագործակցությունից (ԱՊՀ) դուրս գալու իրավական գործընթացը։ Ինչպես Radio Moldova-ի եթերում հայտարարել է երկրի արտաքին գործերի նախարար Միխայ Պոպշոյը, մեկնարկել է ԱՊՀ-ին անդամակցության հիմքում ընկած երեք հիմնարար համաձայնագրերի չեղյալ հայտարարման ընթացակարգը։ Այս մասին տեղեկացնում է Moldpres-ը։

«Ցանկանում եմ առաջին անգամ հայտարարել, որ արդեն գտնվում ենք ԱՊՀ-ի հետ երեք համաձայնագրերի չեղարկման հաստատման գործընթացում։ Խոսքը վերաբերում է այն հիմնարար փաստաթղթերին, որոնց վրա հիմնված է Մոլդովայի անդամակցությունը ԱՊՀ-ին, մասնավորապես՝ ԱՊՀ կանոնադրությանը, որը ստորագրվել է Մինսկում՝ 1993 թվականի հունվարի 22-ին, ԱՊՀ ստեղծման մասին 1991 թվականի դեկտեմբերի 8-ի համաձայնագրին, որը նույնպես ստորագրվել է Մինսկում, ինչպես նաև այդ համաձայնագրի 1991 թվականի դեկտեմբերի 22-ի հավելվածին»,- հայտարարել է Պոպշոյը։

Նախարարի խոսքով՝ այդ փաստաթղթերի չեղարկումը կնշանակի, որ Մոլդովան իրավական առումով այլևս չի հանդիսանա ԱՊՀ անդամ։

Պոպշոյը նշել է, որ գործընթացն արդեն սկսվել է, փաստաթղթերը կուղարկվեն խորհրդարան, իսկ վերջնական որոշումը սպասվում է փետրվարի կեսերին։ Նրա խոսքով՝ այս քայլը կարևոր է Մոլդովայի եվրոպական կողմնորոշման ամրապնդման և երկրի իրավական կարգավիճակի հստակեցման տեսանկյունից։

Նշվում է, որ Մոլդովան ԱՊՀ-ի հետ ստորագրել է 283 համաձայնագիր, որոնցից 71-ը արդեն չեղյալ են հայտարարվել, ևս շուրջ 60-ը գտնվում են չեղարկման գործընթացում։