20.02.2026 | 14:45
Վարդանանց փողոցում առանց բիտումի փոսալցում են արել, կքանդվի. Փամբուխչյան. ՏԵՍԱՆՅՈՒԹ
Թրամփը հայտարարել է Գազայի հատվածում «Խաղաղության խորհուրդ» ստեղծելու մասին
Քաղաքականություն
16.01.2026 | 13:15
ԱՄՆ նախագահ Դոնալդ Թրամփը հայտարարել է «Խաղաղության խորհուրդ» ստեղծելու մասին՝ Գազայի հատվածի վերակառուցումը վերահսկելու համար: Այս կառույցի ստեղծումը Թրամփի՝ Գազայի հատվածի համար խաղաղության ծրագրի մի մասն է՝ միջազգային ուժերի տեղակայման հետ մեկտեղ: ԱՄՆ նախագահն ինքը կգլխավորի «Խաղաղության խորհուրդը», գրում է DW-ի ռուսական ծառայությունը։
«Ինձ համար մեծ պատիվ է հայտարարել Խաղաղության խորհրդի ստեղծման մասին։ Խորհրդի կազմը շուտով կհայտարարվի, բայց կարող եմ վստահորեն ասել, որ սա ամենամեծ և ամենահեղինակավոր Խորհուրդն է, որը երբևէ ստեղծվել է ցանկացած ժամանակ կամ վայրում»,- գրել է Թրամփը TruthSocial սոցիալական ցանցում։
«Խաղաղության խորհրդի» ստեղծման մասին հայտարարվել էր պատերազմից հետո՝ Գազայի հատվածում առօրյա կյանքը կառավարելու հանձնարարականով 15 անդամից բաղկացած պաղեստինյան տեխնոկրատական մարմնի ստեղծման մասին հայտարարությունից կարճ ժամանակ անց, գրում է AFP լրատվական գործակալության։ Վարչակազմը կգործի «Խաղաղության խորհրդի» հսկողության ներքո։
«Որպես Խաղաղության խորհրդի նախագահ՝ ես աջակցում եմ նորանշանակ պաղեստինյան տեխնոկրատական կառավարությանը»,- հայտարարել է Թրամփը։
Ըստ The Telegraph-ի՝ «Խաղաղության խորհրդի» կազմում, հավանաբար, կներառվեն Մեծ Բրիտանիան, Գերմանիան, Ֆրանսիան, Իտալիան, Սաուդյան Արաբիան, Կատարը, Եգիպտոսը և Թուրքիան։
Հունվարի 14-ին ԱՄՆ նախագահի հատուկ բանագնաց Սթիվ Ուիթկոֆը Թրամփի անունից հայտարարել էր Գազայի հատվածում հրադադարի երկրորդ փուլին անցնելու մասին: Այս փուլը, ի թիվս այլ բաների, ենթադրում է ՀԱՄԱՍ-ի զինաթափումը և Միջազգային կայունացման ուժերի (ISF) տեղակայումը Գազայի հատված՝ պաղեստինյան ոստիկանությանը աջակցելու համար։
Դեկտեմբերին ՀԱՄԱՍ-ը, որը Եվրամիության և ԱՄՆ-ի կողմից ճանաչվել է որպես ահաբեկչական կազմակերպություն, հայտարարել էր զենքը վայր դնելու պատրաստակամության մասին մի շարք պայմաններով, այդ թվում՝ Գազայի հատվածից իսրայելցի զինվորների լիակատար դուրսբերման:
«Մեր զենքի ներկայությունը բացատրվում է օկուպացիայով և ագրեսիայով: Եթե օկուպացիան ավարտվի, այդ զենքը կանցնի պետական վերահսկողության տակ»,- պնդել էր ՀԱՄԱՍ-ի առաջնորդ Խալիլ ալ-Հայան։
Թարգմանությունը՝ Էմմա Չոբանյանի
