Ուկրաինան չի եղել և չի լինի խաղաղության խոչընդոտ. Զելենսկին արձագանքել է Թրամփին

Ուկրաինայի նախագահ Վլադիմիր Զելենսկին իր երեկոյան տեսաուղերձում հայտարարել է, որ Ուկրաինան երբեք չի եղել և չի լինի խաղաղության խոչընդոտ։ Նա այսպես է արձագանքել ԱՄՆ նախագահ Դոնալդ Թրամփի հայտարարությանը, որ Կիևը, այլ ոչ թե Մոսկվան է խոչընդոտում հնարավոր համաձայնագրին, գրում է BBC-ի ռուսական ծառայությունը։

«Ռուսական հրթիռները, ռուսական «Շահեդ»-ները, Ուկրաինան ոչնչացնելու ռուսական փորձերը հստակ ապացույց են այն բանի, որ Ռուսաստանին ընդհանրապես համաձայնագրեր պետք չեն։ Երբ Ռուսաստանի պատճառով ուկրաինացիները 20-30 ժամ էլեկտրաէներգիա չունեն, և երբ ռուսական հարվածները նպատակ ունեն խաթարել մեր էներգետիկ ոլորտն ու վնասել մեր ժողովրդին, հենց Ռուսաստանին պետք է ճնշել։ Ես շնորհակալություն եմ հայտնում բոլոր նրանց, ովքեր աջակցում են Ուկրաինային այս հարցում։ Մենք զգալիորեն կակտիվացնենք մեր դիվանագիտական ​​աշխատանքը՝ և՛ հանրային, և՛ պաշտոնական, և՛ մասնավոր, և՛ ոչ պաշտոնական»,- ասել  է Զելենսկին։

Ավելի վաղ, Reuters-ին տված հարցազրույցում Թրամփը պնդել էր, թե ՌԴ նախագահ Վլադիմիր Պուտինը պատրաստ է դադարեցնել գրեթե չորս տարի առաջ իր սկսած պատերազմը։

«Կարծում եմ՝ նա պատրաստ է գործարք կնքել։ Կարծում եմ՝ Ուկրաինան ավելի քիչ է պատրաստ գործարք կնքել»,- ասել էր Թրամփը։

Հարցին՝ ինչո՞ւ ԱՄՆ-ի մասնակցությամբ բանակցությունները դեռևս չեն հանգեցրել խաղաղության, Թրամփը պատասխանել է. «Զելենսկի»։

«Կարծում եմ՝ նրա համար դժվար է դրան գնալ»,- հավելել էր նա հաջորդ հարցից հետո։