Մինեապոլիսում ներգաղթի աշխատակիցը կրակել է վենեսուելացի ներգաղթյալի ոտքին

Մինեապոլիսում ԱՄՆ ներգաղթի և մաքսային ոստիկանության (ICE) աշխատակիցը կրակել է վենեսուելացի քաղաքացու ոտքին, հայտնել է ԱՄՆ ներքին անվտանգության նախարարությունը: Նշվում է, որ դաշնային գործակալը կրակել է «պաշտպանողական» նկատառումներով՝ այն բանից հետո, երբ Վենեսուելայից անօրինական միգրանտը դիմադրել է ձերբակալությանը, գրում է DW-ի ռուսական ծառայությունը։

Դեմոկրատների կողմից վերահսկվող Մինեսոտա նահանգի քաղաքային պաշտոնյաները կոչ  են արել բնակիչներին պահպանել հանգստություն:

«Մենք հասկանում ենք, որ կա զայրույթ»,- ասվում է քաղաքային իշխանությունների հայտարարության մեջ:

Նրանք վերահաստատել են իրենց պահանջը, որ ICE-ի աշխատակիցներն անհապաղ լքեն Մինեապոլիսը և ամբողջ նահանգը։

Դեպքը տեղի է ունեցել մեկ շաբաթ անց այն բանից հետո, երբ Մինեապոլիսում ICE-ի գործակալը երեք անգամ կրակել և սպանել էր բազմազավակ մորը՝ Ռընե Նիկոլ Գուդին, երբ նա իր մեքենայում է եղել։ Դեպքը լայնածավալ բողոքի ցույցեր է առաջացրել ամբողջ երկրում, որոնց արդյունքում հազարավոր մարդիկ դուրս են եկել փողոցներ հենց Մինեապոլիսում: Դրանից հետո ԱՄՆ ներքին անվտանգության նախարար Քրիստի Նոեմը քաղաք էր ուղարկել հարյուրավոր լրացուցիչ դաշնային ոստիկաններ՝ պնդելով, որ դեմոկրատ քաղաքական գործիչները, իբր, ցուցարարներին հրահրում են բռնության ներգաղթային ոստիկանության դեմ։

Մինեսոտա նահանգը դատական ​​հայց է ներկայացրել ԱՄՆ նախագահ Դոնալդ Թրամփի վարչակազմի դեմ։ Նահանգային պաշտոնյաները պնդում են, որ ICE-ի կոշտ գործողությունները տարածաշրջանը դարձրել են «պակաս անվտանգ»։ Իլինոյսը, որտեղ նույնպես ակտիվացել են ICE-ի գործողությունները, նմանատիպ դատական ​​հայց է ներկայացրել դաշնային կառավարության դեմ։

Թրամփի վարչակազմը պնդում է, որ Գուդը «ներքին ահաբեկիչ» էր, և որ ոստիկանը գործել է ինքնապաշտպանության նպատակով, քանի որ, ենթադրաբար, փորձել է վրաերթի ենթարկել նրան: Տեղական իշխանությունները վիճարկում են սա՝ մատնանշելով տեսագրությունները, որոնք, նրանց խոսքով, ցույց են տալիս, որ կինը մեքենան շեղել է ICE-ի աշխատակցից և որևէ սպառնալիք չի ներկայացրել նրա համար:

Թարգմանությունը՝ Էմմա Չոբանյանի