Իրանը վերաբացել է օդային տարածքը կարճատև փակումից հետո

Իրանը վերաբացել է իր օդային տարածքը գրեթե հինգ ժամ տևած փակումից հետո՝ ԱՄՆ-ի և Իրանի միջև հնարավոր ռազմական գործողությունների վերաբերյալ մտահոգությունների ֆոնին, որոնք ավիաընկերություններին ստիպել էին չեղարկել, վերաուղղորդել կամ հետաձգել որոշ չվերթներ, գրում է France 24-ը։

ԱՄՆ Դաշնային ավիացիոն վարչության կայքում տեղադրված հաղորդագրության համաձայն՝ չորեքշաբթի ժամը 17:15-ին (22:15 GMT) Իրանը փակել է իր օդային տարածքը բոլոր չվերթների համար` բացառությամբ դեպի Իրան և Իրանից  կատարվող միջազգային չվերթների։

Flightradar24 ծառայության տվյալներով՝ ծանուցումը հեռացվել է արևելյան ժամանակով ժամը 22:00-ից (GMT) կարճ ժամանակ առաջ, որը ցույց է տվել, որ իրանական Mahan Air, Yazd Airways և AVA Airlines ավիաընկերությունների հինգ չվերթ առաջինների շարքում են, որոնք վերսկսել են թռիչքները երկրում։

Ավելի վաղ Reuters-ը, հղում անելով եվրոպացի պաշտոնյայի, հաղորդել էր, թե ԱՄՆ-ը կարող է հարձակվել Իրանի վրա 24 ժամվա ընթացքում: Սակայն դա տեղի չունեցավ:

Միևնույն ժամանակ, հունվարի 14-ին Միացյալ Նահանգները խորհուրդ էր տվել որոշ զինվորականների և աշխատակիցների  ժամանակավորապես լքել Կատարի «Ալ Ուդեյդ» ավիաբազան՝ Մերձավոր Արևելքում ամենակարևոր ամերիկյան ռազմական բազան, հաղորդել էին Reuters-ը, AFP-ն ու CNN-ը՝ հղում անելով աղբյուրներին: Ամերիկացի պաշտոնյան AP-ին տված հարցազրույցում այս քայլն անվանել էր նախազգուշական միջոց։

Կատարում գտնվող ԱՄՆ ավիաբազայում մշտապես տեղակայված է շուրջ 10,000 զինվորական և քաղաքացիական անձնակազմ: Այն նաև ծառայում է որպես Մերձավոր Արևելքում ԱՄՆ ուժերի հրամանատարական կենտրոն: