07.09.2026 | 14:14
«Էմիլի ֆարմ»-ի 7 մասնաճյուղում 9 վարչական խախտում է արձանագրվել
PKK-ն հայտարարել է, որ Հալեպի բախումները նպատակ ունեն խափանել Թուրքիայի հետ խաղաղության բանակցությունները
Քաղաքականություն
13.01.2026 | 23:13
Սիրիայում կառավարական ուժերի և քուրդ զինյալների միջև տեղի ունեցած մահացու բախումները Թուրքիայի և Քուրդիստանի աշխատավորական կուսակցության (PKK) միջև խաղաղության հաստատման ջանքերը խափանելու փորձ են, հայտարարել է զինյալ խմբավորումը, գրում է Turkish Minute-ը։
«Հալեպի քրդական թաղամասերի վրա հարձակումը և պետական պաշտոնյաների մոտեցումն ու վերաբերմունքը մեր շարժման նկատմամբ խաթարում են «Խաղաղություն և ժողովրդավարական հասարակություն» գործընթացը»,- ասվում է «Ֆըրաթ» լրատվական գործակալության կողմից տարածված PKK-ի հայտարարության մեջ։
Բախումները սկսվել էին անցյալ շաբաթ, երբ քրդերի փաստացի ինքնավար վարչակազմը և ուժերը Սիրիայի նոր կառավարությանն ինտեգրելու վերաբերյալ բանակցությունները փակուղի են մտել։ Կիրակի սիրիական ուժերը լիակատար վերահսկողություն էին հաստատել Հալեպում՝ քաղաքի քրդական թաղամասերը գրավելուց և տեղի մարտիկներին քրդական ինքնավար տարածքներ տարհանելուց հետո՝ մի քանի օր տևած մահացու բախումներից հետո։
Թուրքիան, որը Սիրիայում քուրդ մարտիկներին համարում է ահաբեկչական խմբավորում, որը կապված է PKK -ի հետ, և որն Անկարայի ու նրա արևմտյան դաշնակիցների կողմից սև ցուցակում է, գովաբանել է Սիրիայի գործողությունը՝ այն համարելով «ահաբեկչական կազմակերպությունների դեմ»։
«Հալեպում տեղի ունեցած հարձակումները կասկածի տակ են դնում մեր շարժման և Թուրքիայի միջև կնքված հրադադարը և դրա հիման վրա ընթացող «Խաղաղություն և ժողովրդավարական հասարակություն» գործընթացը։ Մենք առանց վարանելու և քաջությամբ կատարել ենք մեր պարտականությունները «Խաղաղություն և ժողովրդավարական հասարակություն» գործընթացում»,- հայտարարել է PKK-ն՝ կոչ անելով Թուրքիայի իշխող կուսակցությանը և նրա ազգայնական գործընկեր «Ազգային շարժում» կուսակցությանը՝ «զերծ մնալ գործընթացը խաթարող քայլերից և գործելակերպից»։
Թարգմանությունը՝ Էմմա Չոբանյանի
