06.03.2026 | 23:30
ԱՄՆ կոնգրեսականները պահանջում են հետաքննել Վաշինգտոնում Ալիևի անվտանգության աշխատակիցների հետ կապված միջադեպը
Իրանը 2021թ․ վերջից ՌԴ-ին 2,7 միլիարդ դոլարի բալիստիկ և զենիթային հրթիռներ է մատակարարել. Bloomberg
Քաղաքականություն
13.01.2026 | 18:05
Իրանը Ռուսաստանին շուրջ 2,7 միլիարդ դոլարի բալիստիկ և զենիթային հրթիռներ է մատակարարել։ Այս մասին հաղորդում է Bloomberg-ը՝ հղում անելով անանուն արևմտյան անվտանգության պաշտոնյայի, փոխանցում է Current time-ը։
Նշվում է, որ Թեհրանը պայմանագրեր է կնքել Մոսկվայի հետ 2021 թվականի հոկտեմբերից սկսած՝ Ռուսաստանի կողմից Ուկրաինա լիամասշտաբ ներխուժումից մի քանի ամիս առաջ։ Դրանց թվում են հարյուրավոր «Ֆաթահ-360» փոքր հեռահարության բալիստիկ հրթիռներ, շուրջ 500 այլ փոքր հեռահարության բալիստիկ հրթիռներ և 200 զենիթային հրթիռներ։ Գործակալության տվյալներով՝ Իրանը մատակարարել է միլիոնավոր փամփուշտներ և արկեր, ինչպես նաև Shahed-136 անօդաչու թռչող սարքեր և համատեղ տեխնոլոգիաներ, որոնք թույլ են տվել Ռուսաստանին դրանք արտադրել ներքին շուկայում՝ Geran-2 անվամբ, 2023 թվականի սկզբին կնքված 1,75 միլիարդ դոլարի պայմանագրի շրջանակում։
Ընդհանուր առմամբ, արևմտյան աղբյուրները գնահատում են, որ Ռուսաստանը 2021 թվականի վերջից ի վեր իրանական զենքի գնման վրա ծախսել է ավելի քան 4 միլիարդ դոլար։
The Washington Post-ն առաջին անգամ 2022 թվականի աշնանն էր հաղորդել, որ Իրանը կարող է փոքր հեռահարության հրթիռներ փոխանցել Ռուսաստանին՝ «Շահեդ-136» կամիկաձե անօդաչու թռչող սարքերից բացի։ 2024 թվականի փետրվարին Reuters-ը հաղորդել էր, որ Իրանը 2024 թվականի հունվարից Ռուսաստանին է մատակարարել մոտ 400 «Fateh-110 Zolfaghar» տեսակի բալիստիկ հրթիռներ, որոնք ունեն մինչև 700 կմ հեռահարություն։
2024 թվականի սեպտեմբերին մի շարք արևմտյան լրատվամիջոցներ հայտնել էին, որ Իրանը Ռուսաստանին է փոխանցել փոքր հեռահարության բալիստիկ հրթիռների խմբաքանակ: The Times-ի տվյալներով՝ Ռուսաստանը ստացել է ավելի քան 200 «Ֆաթահ-300» (կամ «Ֆաթահ-360») բալիստիկ հրթիռ: 2025 թվականի մայիսին հաղորդվել էր, որ Իրանը մտադիր է Ռուսաստանին փոխանցել «Ֆաթահ-360» հրթիռների արձակման սարքեր:
Մոսկվայի և Թեհրանի միջև մերձեցումը նոր թափով զարգացել է 2022 թվականի փետրվարին Ռուսաստանի կողմից Ուկրաինա լիամասշտաբ ներխուժումից հետո, որը հետագայում հանգեցրեց Ռուսաստանի և Իրանի դեմ պատժամիջոցների կիրառմանը («Ուկրաինայի դեմ ռուսական ագրեսիային աջակցելու» համար):
Իրանի իշխանությունները հերքում են Ռուսաստանին բալիստիկ հրթիռների փոխանցումը:
Թարգմանությունը՝ Էմմա Չոբանյանի
