30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
Քննարկվել է Գիտության ոլորտի զարգացման 2026-2030 թվականների ռազմավարական ծրագրի նախագիծը
Քաղաքականություն
12.01.2026 | 20:37
Վարչապետ Նիկոլ Փաշինյանի գլխավորությամբ Կառավարությունում տեղի է ունեցել քննարկում գիտության ոլորտի զարգացման 2026–2030 թվականների ռազմավարական ծրագրի նախագծի վերաբերյալ, որի ընթացքում անդրադարձ է կատարվել նաև գիտության և տեխնոլոգիաների ոլորտների զարգացման գերակայություններին։ Այս մասին տեղեկացնում են Կառավարության մամուլի ծառայությունից։
Քննարկման ընթացքում Կրթության, գիտության, մշակույթի և սպորտի նախարարության բարձրագույն կրթության և գիտության կոմիտեի նախագահ Սարգիս Հայոցյանը ներկայացրել է գիտության ոլորտի գնահատման չափանիշները, ընդհանրական ցուցիչները, հետազոտությունների և մշակումների համակարգի գործունեության սխեմաները, ինչպես նաև ծրագրի ներդաշնակեցումը այլ ռազմավարական նախաձեռնությունների հետ։
«Ներկայացվել են ծրագրի տեսլականն ու նպատակները, արդյունքային շրջանակը և գիտության ոլորտի գերակայությունները։ Ռազմավարության նախագծով նախատեսվում է հետազոտությունների գերազանցության խթանում, տնտեսական ազդեցության մեծացում, սոցիալական պատասխանատվության բարձրացում, ինչպես նաև ոլորտի վերակազմավորում և առաջխաղացում»,– նշվել է քննարկման ընթացքում։
Հանդիպման մասնակիցները քննարկել են նաև գիտական և գիտատեխնիկական մրցունակ համակարգի ձևավորմանը, ինչպես նաև հետազոտական ենթակառուցվածքների զարգացմանն ուղղված միջոցառումներին վերաբերող հարցեր։
Վարչապետ Նիկոլ Փաշինյանը կարևորել է գիտական կարողությունների զարգացմանն ուղղված պետական քաղաքականության արդյունավետ իրականացումը՝ ընդգծելով այդ ուղղությամբ նախանշված ծրագրերի կյանքի կոչման անհրաժեշտությունը։
