Գերմանիան և Հնդկաստանն ընդլայնում են ռազմական համագործակցությունը

Գերմանիան և Հնդկաստանը մտադիր են խորացնել համագործակցությունը տարբեր  ոլորտներում: Երկուշաբթի Հնդկաստանի Ահմադաբադ քաղաքում կողմերը ստորագրել և հայտարարել են, ընդհանուր առմամբ, 27 համաձայնագրի և մտադրության հռչակագրի մասին՝ Գերմանիայի կանցլեր Ֆրիդրիխ Մերցի և Հնդկաստանի վարչապետ Նարենդրա Մոդիի ներկայությամբ, գրում է DW-ի ռուսական ծառայությունը:

Համաձայնագրերն ընդգրկում են լայն շրջանակի ոլորտներ՝ ռազմական համագործակցությունից և հազվագյուտ մետաղների արդյունահանումից մինչև երկու երկրներում երիտասարդական հոկեյի աջակցություն և գերմանական առողջապահական համակարգ որակյալ անձնակազմի ներգրավում։

Գերմանիայի և Հնդկաստանի պաշտպանության նախարարությունները ստորագրել են երկրների պաշտպանական արդյունաբերությունների միջև համագործակցությունը ընդլայնելու մտադրության մասին հռչակագիր: Airbus Defence-ն արդեն իսկ ակտիվ է Հնդկաստանի շուկայում, իսկ Thyssenkrupp-ի՝ զենքի արտադրությամբ զբաղվող դուստր ձեռնարկություն TKMS-ը նախատեսում է մարտի վերջին Հնդկաստանում ստանալ վեց սուզանավի պատվեր՝ ևս երեքի օպցիայով:

Նշվում է, որ Հնդկաստանը ներկայում մեծապես կախված է Ռուսաստանից զենքի մատակարարումից։

Գերմանիայի տնտեսական գործերի նախարարությունը և Հնդկաստանի հանքարդյունաբերության նախարարությունը ստորագրել են կարևորագույն հանքանյութերի ոլորտում համագործակցության մասին հռչակագիր: Կողմերը նաև համաձայնել են ակտիվացնել CEO Forum-ը՝ Հնդկաստանի հետ տնտեսական կապերը խորացնելու համար։

Գերմանիայի առողջապահության նախարարությունը ստորագրել է համաձայնագիր՝ Գերմանիայի բժշկական ոլորտ հնդիկ մասնագետների ներգրավումը հեշտացնելու համար: Կրթության և հետազոտությունների դաշնային նախարարությունը համաձայնության է եկել իր հնդիկ գործընկերոջ հետ՝ արհեստական ​​բանականության, կիսահաղորդիչների, գերհամակարգիչների և մարտկոցային տեխնոլոգիաների ոլորտում նորարարական գերազանցության կենտրոն ստեղծելու, ինչպես նաև փոխանակման և վերապատրաստման ծրագրերը ընդլայնելու վերաբերյալ:

Գերմանիան արդեն մի քանի տարի է, ինչ ներգրավում է հնդիկ մասնագետների։ Դաշնային զբաղվածության գործակալության տվյալներով՝ Գերմանիայում պարտադիր սոցիալական ապահովագրության ներքո գտնվող աշխատատեղերում աշխատող Հնդկաստանի քաղաքացիների թիվը 2015 թվականի գրեթե 25,000-ից աճել է մինչև գրեթե 170,000՝ 2025 թվականին։ Ավելին, Հնդկաստանը մնում է Գերմանիայում միջազգային ուսանողների ամենամեծ աղբյուր երկիրը։ Գերմանիայի համալսարաններում սովորող հնդիկ ուսանողների թիվը կազմում է մոտավորապես 60,000։

Համաձայնագիր է ստորագրվել նաև Հնդկաստանի նավթի և գազի կարգավորող մարմնի՝ PNGRB-ի հետ, իսկ Գերմանիայի հոկեյի ասոցիացիան և Hockey India-ն համաձայնել են ընդլայնել համագործակցությունը երիտասարդական սպորտի զարգացման գործում։

Uniper էներգետիկ ընկերությունը հայտարարել է Հնդկաստանում տարեկան մինչև 500,000 տոննա ամոնիակ մատակարարելու պայմանագրի ստորագրման մասին։ AM Green-ը կլինի գործընկերը։ Deutsche Post-ը և Հնդկաստանի փոստային ծառայությունը նույնպես հայտարարել են համագործակցելու իրենց մտադրության մասին։

Գերմանիայի կանցլեր Ֆրիդրիխ Մերցը երկուշաբթի օրը երկօրյա պաշտոնական այցով ժամանել է Հնդկաստան՝ Հնդկաստանի վարչապետ Նարենդրա Մոդիի հրավերով: Հնդկաստանի արտաքին գործերի նախարարության տվյալներով՝ երկու առաջնորդները մտադիր են գնահատել Հնդկաստան-Գերմանիա ռազմավարական գործընկերության առաջընթացը, որն անցյալ տարի նշել է իր 25-ամյակը։

Ահմադաբադում իրենց բանակցությունների ընթացքում Մերցը և Մոդին, ըստ Հնդկաստանի արտաքին գործերի նախարարության հայտարարության, կքննարկեն առևտրի, ներդրումների, տեխնոլոգիաների, կրթության և պաշտպանության ոլորտներում համագործակցության խորացման հարցերը: Մերզի երթուղին ներառում է նաև այցելություն Մահաթմա Գանդիի աշրամ՝ Հնդկաստանի անկախության շարժման առաջնորդի նախկին նստավայրը։

Երեքշաբթի Գերմանիայի կանցլերը կայցելի Բանգալոր, որը համարվում է Հնդկաստանի բարձր տեխնոլոգիական արդյունաբերության կենտրոնը։

Թարգմանությունը՝ Էմմա Չոբանյանի