07.09.2026 | 11:52
Ուկրաինական ԱԹՍ-ների հարձակման հետևանքով Պերմում բնակելի շենք է վնասվել․ կա զոհ․ ՏԵՍԱՆՅՈՒԹ
Վրաստանի նախկին վարչապետ Իրակլի Ղարիբաշվիլին դատապարտվելու է 5 տարվա ազատազրկման
Քաղաքականություն
12.01.2026 | 16:37
Վրաստանի դատախազությունը հայտարարել է, որ մեղադրյալ, նախկին վարչապետ Իրակլի Ղարիբաշվիլիի հետ համաձայնության է եկել։ Հայտարարության մեջ նշվում է, որ նա դատապարտվելու է հինգ տարվա ազատազրկման, գրում է Эхо Кавказа-ն։
Ղարիբաշվիլին, որը մեղադրվում է հատկապես խոշոր չափերի փողերի լվացման մեջ, պետք է վճարի 1 միլիոն լարի տուգանք որպես լրացուցիչ պատիժ։
Նշվում է, որ «հանցավոր գործունեության միջոցով ձեռք բերված և նրա տան խուզարկության ժամանակ առգրավված» գումարը կբռնագրավվի պետության կողմից։
«Իրակլի Ղարիբաշվիլին ընդունում է կատարած հանցագործությունը և համաձայնվում է մեղքի ճանաչման համաձայնագրի պայմաններին։ Դատարանն արդեն բավարարել է դատախազի միջնորդությունը մեղքի ճանաչման համաձայնագրի վերաբերյալ», – ասվում է հայտարարության մեջ։
Առանց մեղքի ընդունման համաձայնագրի՝ Ղարիբաշվիլիին կսպառնար 9-ից 12 տարվա ազատազրկում։
Նրա փաստաբանի խոսքով՝ Վրաստանի նախկին վարչապետն արդեն տեղափոխվել է քրեակատարողական հիմնարկ։
Վրաստանի գլխավոր դատախազ Գիորգի Գվարակձեն հայտարարել էր, որ պետական պաշտոն զբաղեցնելու ընթացքում Ղարիբաշվիլին «գաղտնի և աննկատ զբաղվել է տարբեր ձեռնարկատիրական գործունեությամբ», ստացել է մեծ քանակությամբ անօրինական եկամուտներ և նաև կեղծ տեղեկություններ է տրամադրել իր ակտիվների հայտարարագրերում։
2025 թվականի հոկտեմբերի 17-ին կատարված խուզարկության ժամանակ Ղարիբաշվիլիի բնակարանից հայտնաբերվել և առգրավվել էր 6,5 միլիոն դոլար։
Հոկտեմբերի 24-ին դատարանը Ղարիբաշվիլիին պարտավորեցրել էր վճարել 1 միլիոն լարի գրավ՝ անշարժ գույքի գրավադրմամբ։ Նրան նաև արգելվել է լքել երկիրը։
Վրաստանի նախկին վարչապետի գործով դատական նիստը նախկինում հետաձգվել էր և նշանակվել էր փետրվարի 12-ին։
Իրակլի Ղարիբաշվիլին երկու անգամ զբաղեցրել է Վրաստանի վարչապետի պաշտոնը և միլիարդատեր Բիձինա Իվանիշվիլիի ամենամտերիմ դաշնակիցներից մեկն էր։ 2024 թվականի ապրիլին նա հայտարարել էր քաղաքականությունից իր լիակատար հեռանալու մասին՝ նշելով, որ ցանկանում է ավելի շատ ժամանակ նվիրել իր ընտանիքին։
Թարգմանությունը` Էմմա Չոբանյանի
