Կիպրոսում անհետացել է ռուսաստանցի գործարար՝ «Ուրալկալի»-ի նախկին ղեկավարը

Կիպրոսի ոստիկանությունը հայտնել է ռուսաստանցի գործարար Վլադիսլավ Բաումգերտների՝ «Ուրալկալի»-ի նախկին ղեկավարի անհետացման մասին, գրում  է Meduza-ն։

Բաումգերտները կապի դուրս չի գալիս հունվարի 7-ից։ Վերջին անգամ նրան տեսել են Լիմասոլում գտնվող իր բնակարանից դուրս գալիս։ Նրա գործընկերը հայտնել է, որ Բաումգերտները իր բազմաթիվ հեռախոսազանգերին չի պատասխանել։

Հունվարի 10-ին մասնագիտացված խմբերը որոնումներ են անցկացրել Պիսուրի գյուղի մոտակայքում գտնվող տեղանքում: Բաումգերտների բջջային կապի ազդանշանը վերջին անգամ արձանագրվել է այնտեղ՝ զառիթափ, ժայռոտ ափամերձ գծում: Հունվարի 11-ին որոնողական գործողություններն ընդլայնվել են՝ ներառելով նաև ինքնաթիռներ, հետագայում, սակայն, դրանք դադարեցվել են մոտեցող փոթորկի պատճառով:

53-ամյա Բաումգերտները ղեկավարել է «Ուրալկալի»-ն 2003-ից 2013 թվականներին՝ սկզբում որպես առևտրային տնօրեն, ապա՝ գործադիր տնօրեն։ 2013 թվականի օգոստոսին նա ձերբակալվել է Մինսկում, որտեղ նա ժամանել էր այն ժամանակվա վարչապետ Միխայիլ Մյասնիկովիչի հետ կալիումի վաճառքի վերաբերյալ բանակցությունների, և մեղադրվել է պաշտոնեական լիազորությունների չարաշահման մեջ։

Ըստ «The Bell»-ի՝ Բաումգերտները դարձել էր ռուս-բելառուսական «կալիումի պատերազմի» պատանդը։ Երեք ամիս նախնական կալանքի և տնային կալանքի տակ գտնվելուց հետո նա տեղափոխվել էր Մոսկվա։ Ռուսաստանում Բաումգերտների դեմ հարուցվել էր քրեական գործ, սակայն այն կարճվել է 2015 թվականին՝ ապացույցների բացակայության հիմքով։ Հետագայում Բաումգերտները վերադարձել էր բիզնեսին և դարձել «Global Ports» նավահանգստային ընկերության գործադիր տնօրեն։ Վերջին տարիներին նա բնակվում էր Կիպրոսում։

Թարգմանությունը՝ Էմմա Չոբանյանի