ԱՄՆ-ը հարվածներ է հասցրել Սիրիայում «Իսլամական պետություն» խմբավորման օբյեկտներին

ԱՄՆ զինված ուժերը գործընկեր ուժերի հետ համատեղ հունվարի 10-ին լայնածավալ հարվածներ են հասցրել «Իսլամական պետություն» (ԻՊ) խմբավորման օբյեկտներին Սիրիայի ամբողջ տարածքում, հայտնել է ԱՄՆ Զինված ուժերի Կենտրոնական հրամանատարությունը։

Հարձակումը դարձել է «Բազեի աչքի հարված» գործողության մի մասը, որը մեկնարկել է 2025 թվականի դեկտեմբերի 19-ին՝ այն բանից հետո, երբ Պալմիրայում ԻՊ զինյալների հարձակման հետևանքով զոհվել են երկու ամերիկացի զինվորական և քաղաքացիական թարգմանիչ։

«Մեր ուղերձը մնում է հստակ․ եթե դուք վնաս հասցնեք մեր զինվորներին, մենք ձեզ կգտնենք և կկործանենք աշխարհի ցանկացած կետում՝ անկախ նրանից, թե որքան ջանք կգործադրեք արդարադատությունից խուսափելու համար»,-նշված է Կենտրոնական հրամանատարության հայտարարությունում։ Հարվածների հետևանքով զոհերի առկայության մասին չի հաղորդվում։

CNN-ի աղբյուրի տվյալներով՝ գործողության ընթացքում կիրառվել է ավելի քան 90 բարձր ճշգրտությամբ զինամթերք, որոնց միջոցով խոցվել է ավելի քան 35 թիրախ։ Հարվածներին մասնակցել է ավելի քան 20 ինքնաթիռ։

Դեկտեմբերի 13-ին Պալմիրայում ԻՊ զինյալները հարձակվել են ամերիկյան ռազմական պարեկի վրա։ Զոհվել են ԱՄՆ երեք քաղաքացիներ՝ 25-ամյա Էդգար Բրայան Տորեսե-Տովարը, 29-ամյա Ուիլյամ Նաթանիել Հովարդը (երկուսն էլ Այովայի ազգային գվարդիայից) և թարգմանիչ Այադ Մանսուր Սաքաթը։ Դրանից հետո՝ դեկտեմբերի 20-ին, ԱՄՆ-ը իրականացրել է օդային հարվածների շարք «Իսլամական պետության» դիրքերի վրա։

Սիրիայում տեղակայված են հարյուրավոր ամերիկացի զինծառայողներ։ Նրանք այնտեղ մնում են ԱՄՆ-ի՝ ԻՊ-ի դեմ պայքարի առաքելության շրջանակում, որը սկսվել է այն բանից հետո, երբ զինյալները 2010-ականների կեսերին վերահսկողության տակ էին վերցրել Սիրիայի և Իրաքի զգալի հատվածներ։