ԱՄՆ-ը կհանեն Վենեսուելայի նկատմամբ կիրառվող որոշ պատժամիջոցներ՝ նավթի վաճառքը հեշտացնելու համար․ ԱՄՆ ֆինանսների նախարար

ԱՄՆ ֆինանսների նախարար Սքոթ Բեսենթը հայտարարել է, որ Վենեսուելայի նկատմամբ կիրառվող ամերիկյան լրացուցիչ պատժամիջոցները հնարավոր է հանվեն արդեն հաջորդ շաբաթ՝ նավթի վաճառքը հեշտացնելու նպատակով, հաղորդում է Reuters-ը։ Նա նաև նախատեսում է հաջորդ շաբաթ հանդիպել Արժույթի միջազգային հիմնադրամի (ԱՄՀ) և Համաշխարհային բանկի ղեկավարների հետ՝ Վենեսուելայի հետ նրանց համագործակցության վերականգնման հարցը քննարկելու համար։

Ուրբաթ օրը Reuters-ին տված հարցազրույցում Բեսենթը նշել է, որ ԱՄՀ-ում սառեցված՝ մոտ 5 միլիարդ դոլարի չափով վենեսուելական պահուստային ակտիվները կարող են ուղղվել երկրի տնտեսության վերականգնմանը։ Ներկայումս Վենեսուելան ԱՄՀ-ում ունի շուրջ 3,59 միլիարդ հատուկ փոխառության իրավունք (ՀՓԻ), որոնք հնարավոր է փոխարկել դոլարի։ Ֆինանսների նախարարությունը ուսումնասիրում է այնպիսի փոփոխություններ, որոնք թույլ կտան Վենեսուելա վերադարձնել նավթի վաճառքից ստացված եկամուտները, որոնց մեծ մասը ներկայումս պահվում է նավերի վրա։ Պատժամիջոցների հանման ժամկետների վերաբերյալ հարցին Բեսենթը պատասխանել է, որ դա կարող է տեղի ունենալ արդեն հաջորդ շաբաթ, սակայն չի հստակեցրել՝ երբ։

Ինչպես պարզաբանում է Reuters-ը, այս քայլերը Թրամփի վարչակազմի ջանքերի մի մասն են՝ Վենեսուելայում իրավիճակը կայունացնելու և ամերիկյան նավթային ընկերություններին երկիր վերադարձնելու ուղղությամբ։ Մեկ շաբաթ առաջ ամերիկյան ուժերը Կարակասում ձերբակալել են Վենեսուելայի ղեկավար Նիկոլաս Մադուրոյին և նրան տեղափոխել Նյու Յորք՝ թմրամիջոցների ապօրինի շրջանառության մեղադրանքներ ներկայացնելու համար։ Ուրբաթ երեկոյան նախագահ Դոնալդ Թրամփը ստորագրել է հրամանագիր, որը արգելում է նավերին և վարկատուներին բռնագրավել ԱՄՆ ֆինանսների նախարարության հաշվեհամարներում պահվող վենեսուելական նավթային եկամուտները։

Բեսենթը նաև վստահություն է հայտնել, որ փոքր մասնավոր ընկերությունները արագորեն կվերադառնան Վենեսուելայի նավթային ոլորտ, չնայած որոշ խոշոր նավթային կորպորացիաների, այդ թվում՝ Exxon Mobil-ի, դժկամությանը։ Նրա խոսքով՝ Վենեսուելայում վաղուց գործող Chevron-ը զգալիորեն կմեծացնի իր պարտավորությունները, իսկ ԱՄՆ արտահանման-ներմուծման բանկը կարող է դեր խաղալ Վենեսուելայի նավթային ոլորտի ֆինանսավորման երաշխավորման գործում։

Ավելի վաղ հաղորդվել էր, որ նավթային ընկերությունները, որոնք հետաքրքրված են վենեսուելական նավթի արտահանման վերսկսմամբ ԱՄՆ, շտապ բանակցություններ են վարում տանկերային փոխադրումների կազմակերպման և վատ վիճակում գտնվող վենեսուելական նավահանգիստներից բեռների անվտանգ վերաբեռնման հարցերով։ Իրավիճակը բարդանում է նրանով, որ ԱՄՆ-ը պատժամիջոցներ է սահմանել այն տանկերների նկատմամբ, որոնց վրա ներկայումս հիմնականում պահվում է Վենեսուելայում արդյունահանված նավթը, ինչի պատճառով դրանց հետ ցանկացած փոխգործակցություն համարվում է անօրինական։