Մի խումբ քահանաներ միանում են վարչապետի՝ «եկեղեցու բարենորոգման» հայտարարությանը, մյուսները՝ զորակցում Կաթողիկոսին

Տեր Գալուստ քահանա Սահակյանը, Տեր Անուշավան քահանա Կոշեցյանը, Տեր Հովհաննես քահանա Մաթևոսյանը, Տեր Արարատ քահանա Օրդոյանը, Տեր Զգոն քահանա Աբրահամյանը, Տեր Պարթև քահանա Մուրադյանը, Տեր Աշոտ քահանա Սաֆարյանը, Տեր Շմավոն քահանա Ղևոնդյանը, Տեր Պողոս քահանա Միքայելյանը, Տեր Մովսես քահանա Աշուրյանը միացել են վարչապետ Փաշինյանի և 10 եպիսկոպոսների՝ «Հայաստանյայց Առաքելական Սուրբ Եկեղեցու բարենորոգման» հայտարարությանը։ Ավելի վաղ հայտարարությանն էին միացել նաև Տեր Մկրտիչ Մուշադյանը և Տեր Մաշտոց քահանա Ստեփանյանը։

ՀՀ վարչապետ Նիկոլ Փաշինյանն արձագանքել է՝ շնորհակալություն հայտնելով հայտարարությանը միացած 13 քահանաներին։

Մայր Աթոռ Սուրբ Էջմիածնի միաբան Տեր Ասողիկ աբեղա Կարապետյաննիր հերթին հանդես էր եկել հայտարարությամբ՝ շնորհակալություն հայտնելով իրեն ուղղված աջակցող զանգերի և գրառումների համար, ինչպես նաև ընդգծելով «Հայոց Եկեղեցու և Ամենայն Հայոց Կաթողիկոսի նկատմամբ հավատարմության և նվիրումի կարևորությունը»։

Տեր Ասողիկն անդրադարձել է, իր բնորոշմամբ, «հակաեկեղեցական գործողություններին» և դրանց հեղինակներին՝ հայտարարելով, որ  արժանանալու են «եկեղեցական արդար դատաստանի»։

Մի խումբ քահանաներ իրենց հերթին զորակցությունն են հայտնել Ամենայն Հայոց Կաթողիկոս Գարեգին Բ-ին։

Ավելի վաղ Factor.am-ը տեղեկացրել էր, որ Փաշինյանը համակարգող խորհուրդ է ձևավորել ու հայտարարել «եկեղեցու բարենորոգման մեկնարկի» մասին։ Մայր Աթոռը  արձագանքել  էր ՀՀ վարչապետ Նիկոլ Փաշինյանի և տասը եպիսկոպոսների ստորագրած հայտարարությանը։