Առաջին զորակոչը՝ մեկուկես տարով. ՏԵՍԱՆՅՈՒԹ

Զինկոմի բակում այսօր վաղ առավոտից հավաքված էին զորակոչիկները և նրանց հարազատները:

«Պոզիտիվ գնում եմ Հայաստանի Հանրապետության, ծնողներիս, ընկերներիս էն մարդկանց համար ծառայելու, ովքեր էս երկիրը շենացնելու են»,- ասում է բանակ մեկնող տղաներից մեկը:

Զինակոչիկները հիմնականում քչախոս են։ Նրանք նախ բժշկական ստուգում են անցնում:

«Ովքեր ճանաչվել են պիտանի կամ սահմանափակումով պիտանի, այստեղ մի անգամ էլ վերջնական բուժզննություն են անցնում, ուսումնասիրվում են փաստաթղթերը»,-  ասում է զինկոմիսար Աշոտ Պետրոսյանը:

Զինակոչիկները մի քանի ժամից արդեն կրելու են զինվորական համազգեստը։ Ասում են՝ ծառայության վայրն էական չէ, կարևորը հայրենիքի սահմաններն անառիկ պահելն է։

«Գնում եմ, որ հայրենիքս պահեմ, ընտանիքիս համար եմ գնում, մեր եղբայրները մեր համար են պահել, մենք էլ մեր փոքր եղբայրների, քույրերի համար ենք գնում»,- նշում է տղաներից մեկը:

Ոչ այնքան զինակոչիկներին, որքան նրանց ծնողներին ու հարազատներին է ոգևորել կրճատված՝ մեկուկես տարի ծառայության ժամկետը։

«Ծնողի համար շատ լավ է, որ տարիուկես է, թեկուզ երկու տարի էլ լիներ, ամենակարևորը խաղաղությունն է»,- նշում է ծնողներից մեկը:

«Միևնույն է՝ անհանգստությունը կա, բայց ավելի ուրախ ենք, որ վեց ամիս շուտ կվերջացնի, կգա, կարևորը խաղաղություն լինի, բոլորը ծառայեն, հետ գան»,- ասում է մեկ այլ ծնող:

Տղաները ծառայության ժամկետի կրճատումը դրական են համարում, բայց ասում են՝ տարբերությունն այդքան  մեծ չէ, կարևորը՝ պատրաստականությունն է ու մարտական ոգին։

Ավտոբուսները զինակոչիկներին հավաքակայան են տեղափոխում. հենց այնտեղ էլ վիճակահանությամբ կորոշվի ծառայության վայրը։

Մանրամասները` տեսանյութում:

Արփի Հակոբյան