ԱՄՆ-ն Ռուսաստանի «ստվերային նավատորմի» ևս մեկ լցանավ է առգրավել

ԱՄՆ ուժերը Վենեսուելայից նավթի արտահանումը սահմանափակելու գործողության շրջանակում առգրավել են հինգերորդ լցանավը, հաղորդում է Wall Street Journal-ը:

Նշվում է, որ ԱՄՆ առափնյա պահպանության ծառայությունը Վենեսուելայի ափերի մոտ գտնվող ջրերում առգրավել է Olina նավը, որը պատժամիջոցների տակ է ռուսական նավթ տեղափոխելու համար: ԱՄՆ պաշտոնյաների խոսքով՝ ափամերձ պահպանության աշխատակիցները լցանավ բարձրացել են հունվարի 9-ի առավոտյան, գրում է The Insider-ը։

Reuters-ի հաղորդմամբ՝ Olina-ի առգրավման գործողությունը տեղի է ունեցել Կարիբյան ծովում՝ Տրինիդադ և Տոբագո կղզու մոտ։

«Նավի AIS հետևողական համակարգը վերջին անգամ ակտիվ է եղել 52 օր առաջ՝ Վենեսուելայի բացառիկ տնտեսական գոտում՝ Կյուրասաոյից հյուսիս-արևելք»,- հայտնել է բրիտանական ծովային ռիսկերի կառավարման Vanguard ընկերությունը։

Նավը Վենեսուելան լքել է անցյալ շաբաթ՝ լիովին բեռնված, նավատորմում գտնվող մի խումբ այլ նավերի հետ միասին, այն բանից կարճ ժամանակ անց, երբ Միացյալ Նահանգները հունվարի 3-ին գերի է վերցրել Վենեսուելայի նախագահ Նիկոլաս Մադուրոյին: Արդյունաբերական ոլորտի աղբյուրը Reuters-ին հայտնել է, որ ԱՄՆ-ի շարունակական ռազմածովային շրջափակման պատճառով լցանավը վերադարձել է Վենեսուելա բեռնված:

Equasis նավագնացության տվյալների բազայի համաձայն՝ Olina-ն նավարկում է Արևելյան Թիմորի դրոշով, չնայած այնտեղ գրանցված չէ: Նավը նախկինում կոչվել է Minerva M:

Wall Street Journal-ը նշում է, որ Վենեսուելայի նավթի մոտ 70%-ն արտահանվում է պատժամիջոցների տակ գտնվող նավերի միջոցով, ինչը թույլ է տալիս շրջանցել ԱՄՆ-ի կողմից երկրի դեմ սահմանված պատժամիջոցները: ԱՄՆ ռազմածովային ուժերը Հարավային Ամերիկայի մոտակայքում պահում են մի քանի նավեր, այդ թվում՝ USS Gerald R. Ford ավիակիրը՝ առափնյա պահպանությանը լցանավի հետապնդման գործում օգնելու համար:

Թարգմանությունը՝ Էմմա Չոբանյանի