Շվեյցարիան կոչ է արել Երևանին ու Բաքվին՝ շարունակել կայուն խաղաղություն ապահովելուն ուղղված քայլերը

Շվեյցարիան կոչ է անում Ադրբեջանին և Հայաստանին՝ շարունակել Հարավային Կովկասի տարածաշրջանում երկարատև խաղաղություն ապահովելու ջանքերը։ Այս մասին ադրբեջանական Report-ին հայտնել են Շվեյցարիայի արտաքին գործերի նախարարությունից։

Գերատեսչությունը նաև ընդգծել է 2025 թվականի օգոստոսի 8-ին Վաշինգտոնում կայացած Ադրբեջանի, ԱՄՆ-ի և Հայաստանի առաջնորդների գագաթնաժողովի կարևորությունը՝ հարավկովկասյան երկու երկրների միջև հարաբերությունների կարգավորման համատեքստում։

«Շվեյցարիան ողջունում է Հայաստանի և Ադրբեջանի միջև հարաբերություններում վերջին նշանակալի դրական զարգացումները, այդ թվում՝ 2025 թվականի օգոստոսի 8-ին Վաշինգտոնում ընդունված համատեղ հռչակագիրը։ Շվեյցարիան կոչ է անում երկու կողմերին էլ լիովին իրականացնել համաձայնեցված միջոցառումները և շարունակել իրենց ջանքերը՝ հասնելու տևական խաղաղության, որը կօգտակար լինի իրենց ժողովուրդների և ամբողջ տարածաշրջանի համար»,- նշել է Շվեյցարիայի ԱԳՆ-ն։

Խոսելով Եվրոպայում անվտանգության և համագործակցության կազմակերպության (ԵԱՀԿ) 2026 թվականի նախագահության ընթացքում Շվեյցարիայի առաջնահերթությունների մասին՝ նախարարությունը նշել է, որ Բեռնը մտադիր է խթանել անվտանգության հարցերի շուրջ ներառական երկխոսությունը և սերտորեն համագործակցել բոլոր մասնակից պետությունների հետ, ինչպես նաև խթանել բոլոր 57 անդամ երկրների համար ընդունելի կոնսենսուսի վրա հիմնված լուծումները։

ԵԱՀԿ գործող նախագահ, Շվեյցարիայի արտաքին գործերի նախարար Ինացիո Կասիսի՝ Հարավային Կովկասի երկրներ հնարավոր այցի վերաբերյալ հարցին պատասխանելով՝ արտաքին գործերի նախարարությունը շեշտել է, որ նա նախատեսում է այցելել ԵԱՀԿ մի շարք մասնակից պետություններ, սակայն ճշգրիտ ամսաթիվ չի նշել։

«Ճանապարհորդության ծրագրերը դեռևս պաշտոնապես չեն հայտարարվել, ուստի այս փուլում որևէ լրացուցիչ տեղեկատվություն կոնկրետ այցելությունների կամ օրակարգերի մասին չի կարող տրամադրվել»,- ասվում է հայտարարության մեջ։

Թարգմանությունը՝ Էմմա Չոբանյանի