Ռուսաստանը «Օրեշնիկ»-ով հարվածել է Լվովի մարզին. ՌԴ-ն ՊՆ-ն դա անվանել է Պուտինի նստավայրի վրա հարձակման պատասխան. ՏԵՍԱՆՅՈՒԹ

Ռուսական զորքերը Լվովում կարևոր ենթակառուցվածքային օբյեկտին հարվածել են բալիստիկ հրթիռով, հավանաբար՝ «Օրեշնիկ»-ով, գրում է Meduza-ն։

Քաղաքապետ Անդրեյ Սադովին հայտնել է հարվածի մասին։ Նա ասել է, որ Լվովում օդային հարձակման տագնապի ազդանշանի հնչելուց հետո լսվել են մի շարք պայթյուններ։ Ավելի ուշ նա հայտնել է, որ հարված է հասցվել կարևորագույն ենթակառուցվածքային օբյեկտի։ «Դեռևս անհայտ է՝ արդյոք դա «Օրեշնիկ» հրթիռ էր։ Զինվորականները կտրամադրեն տեղեկատվություն», – հավելել է նա։ Հարվածի հետևանքով զոհերի մասին տեղեկություններ չեն հաղորդվում։

Ուկրաինայի ռազմաօդային ուժերի «Արևմտյան» հրամանատարությունը հայտարարել է, որ հունվարի 8-ին, ժամը 23:47-ին, ռուսական ուժերը բալիստիկ հրթիռով հարվածել են Լվովում գտնվող ենթակառուցվածքային օբյեկտներին: «Օդային թիրախը շարժվում էր մոտավորապես 13,000 կիլոմետր ժամ արագությամբ բալիստիկ հետագծով», – ասվում է հայտարարության մեջ: Հրթիռի տեսակը կորոշվի դրա բոլոր բաղադրիչների ուսումնասիրությունից հետո:

Ուկրաինայի ռազմաօդային ուժերի հրամանատարության հաղորդագրության բաժնի պետ, գնդապետ Յուրի Իգնատը հայտարարել է հրթիռի արձակման մասին Աստրախանի մարզի Կապուստին Յար զորավարժարանից։

«Կար բալիստիկ հրթիռների սպառնալիքի մասին նախազգուշացում։ Արձակումները, հավանաբար, տեղի են ունեցել Ռուսաստանի Կապուստին Յար զորավարժարանից։ Այնուհետև պայթյուններ են լսվել Լվովի մարզում», – ասել է Իգնատը։

Ռուսական Z-ալիքները նույնպես հաղորդում են Լվովի վրա «Օրեշնիկ»-ով հարվածի մասին։

Ըստ «Два майора» տելեգրամ ալիքի՝ «նախնական թիրախը խոշոր գազապահեստարանն էր կամ դրա ցամաքային ենթակառուցվածքը»։ Wargonzo ալիքը հաղորդում է, որ հարվածի թիրախը Ստրիի գազային տերմինալն էր՝ Եվրոպայի ամենամեծ գազապահեստարանը։

Ուկրաինական խմբերը նույնպես հաղորդում են, որ հարվածի թիրախը Ստրին է եղել, որը գտնվում է Լվովից մոտավորապես 70 կիլոմետր հարավ։

Ռուսաստանի նախորդ հարվածը «Օրեշնիկ» համակարգով հասցվել էր Դնեպրի «Յուժմաշ» գործարանին 2024 թվականի նոյեմբերին։

Ռուսական զորքերը գիշերն անօդաչու թռչող սարքերով և հրթիռներով հարձակվել են Կիևի վրա։ Տեղական իշխանությունների վերջին տվյալներով՝ չորս մարդ զոհվել է, իսկ ավելի քան 10-ը՝ վիրավորվել։ Կիևի մի քանի թաղամասերի տներում հրդեհներ են բռնկվել։

Հունվարի 9-ի առավոտյան Ռուսաստանի պաշտպանության նախարարությունը հայտարարել է, որ ռուսական ուժերը, «ի պատասխան Կիևի կողմից Պուտինի նստավայրի վրա հարձակման»,  «մասշտաբային հարված են հասցրել, այդ թվում՝ «Օրեշնիկ» հրթիռով, Ուկրաինայի կարևորագույն օբյեկտների դեմ»։

Նշվում է, որ «հարվածի նպատակներն իրագործվել են»։ 2025 թվականի դեկտեմբերի վերջին Ռուսաստանի իշխանությունները հայտարարել էին, որ Ուկրաինան անօդաչու թռչող սարքերով հարձակում է իրականացրել Վլադիմիր Պուտինի Վալդայի նստավայրի վրա։

Ռուսաստանը որևէ հաստատում չէր տրամադրել հարձակման վերաբերյալ։ Մի քանի օր անց Դոնալդ Թրամփը հայտարարել էր, որ չի հավատում Պուտինի նստավայրի վրա ուկրաինական հարձակման մասին հաղորդագրություններին։ «Ես չեմ հավատում, որ այդ հարվածը տեղի է ունեցել։ Ինչ-որ բան տեղի է ունեցել [նստավայրի] մոտակայքում, բայց դա դրա հետ որևէ կապ չունի», – ասել էր  նա։

Թարգմանությունը` Էմմա Չոբանյանի