Թուրքիայի ԱԳ նախարարը Սիրիայի քրդական ուժերին մեղադրում է Իսրայելի օրակարգին ծառայելու համար

Թուրքիայի արտաքին գործերի նախարար Հաքան Ֆիդանը քրդերի գլխավորած «Սիրիայի դեմոկրատական ​​ուժերին» (SDF) մեղադրել է Սիրիայի կայունությանը խոչընդոտելու մեջ՝ պնդելով, որ խմբավորումը գործում է Իսրայելի տարածաշրջանային օրակարգին համապատասխան, մինչ սիրիական ուժերը ռազմական գործողություններ են սկսել Հալեպի քրդաբնակ մեծամասնությամբ թաղամասերում, գրում է Turkish Minute-ը։

Օմանի արտաքին գործերի նախարար Բադր բին Համադ ալ-Բուսաիդիի հետ Անկարայում կայացած համատեղ մամուլի ասուլիսում Ֆիդանը պնդել է, որ «SDF-ի համառությունը՝ պաշտպանելու իրենց տիրապետության տակ գտնվող տարածքները ցանկացած գնով», Սիրիայում խաղաղության և կայունության ամենամեծ խոչընդոտն է, նաև հավելել, որ Անկարան ցանկանում է, որ Հալեպում «կարգավորվի» քրդական մեծամասնությամբ Շեյխ Մաքսուդ և Աշրաֆիյա թաղամասերից SDF-ի դուրսբերման ու ծանր զինամթերքի հեռացման միջոցով, որպեսզի կենտրոնական կառավարությունը կարողանա կատարել իր պարտականությունները քաղաքում։ Նա նաև պնդել է, որ SDF-ը դարձել է Իսրայելի քաղաքականության «գործիք»՝ ասելով, որ Իսրայելն օգտվում է տարածաշրջանում առկա պառակտումից, քաոսից և թուլությունից։

Հաղորդվում է, որ երեքշաբթի սկսված մարտերի պատճառով Հալեպ նահանգում տեղահանվել է ավելի քան 57,000 մարդ։

SDF-ն հայտնել է, որ քրդաբնակ մեծամասնությամբ թաղամասերում զոհվել է առնվազն ութ քաղաքացիական անձ, մինչդեռ սիրիացի պաշտոնյաները հայտնել են կառավարության կողմից վերահսկվող շրջակա տարածքներում առնվազն հինգ քաղաքացիական անձի և մեկ զինվորի զոհվելու մասին։

Երկու կողմերն էլ միմյանց մեղադրել են քաղաքացիական բնակչությամբ թաղամասերն ու ենթակառուցվածքները թիրախավորելու մեջ։

Իսրայելը արտաքին գործերի նախարար Գիդեոն Սաարը, իր հերթին, X-ում գրել է, որ սիրիական ուժերի կողմից Հալեպում քրդական փոքրամասնության դեմ հարձակումները «ծանր և վտանգավոր» են և զգուշացրել, որ միջազգային լռությունը կարող է ավելի շատ բռնություն հրահրել:

Թուրքիան SDF-ը համարում է անվտանգության սպառնալիք, քանի որ Անկարան պնդում է, որ այդ խմբավորման մեջ գերիշխում են Ժողովրդական պաշտպանության ջոկատները (YPG), որոնց Անկարան նկարագրում է որպես Քուրդիստանի աշխատավորական կուսակցության (PKK) շարունակություն, որը Թուրքիայի և նրա արևմտյան դաշնակիցների կողմից ճանաչվել է որպես ահաբեկչական կազմակերպություն։

Թուրքիայի պաշտպանության նախարարությունն առանձին մեկնաբանությամբ նշել է, որ Հալեպի գործողությունն իրականացվել է «ամբողջությամբ սիրիական բանակի կողմից» և հերքել Թուրքիայի մասնակցությունը՝ միաժամանակ նշելով, որ Թուրքիան պատրաստ է աջակցել Սիրիային, եթե խնդրեն։

ՄԱԿ-ի խոսնակը չորեքշաբթի  հայտարարել է, որ գլխավոր քարտուղար Անտոնիո Գուտերեշը մտահոգված է քաղաքացիական անձանց մահվան և վիրավորների մասին հաղորդագրությունների կապակցությամբ և կոչ է արել լիցքաթափել իրավիճակն ու վերադառնալ բանակցություններին՝ 2025 թվականի մարտի 10-ի համաձայնագիրը կյանքի կոչելու համար։

Հալեպում կատարվողը քննադատության է արժանացել Թուրքիայի քրդամետ «Ժողովուրդների հավասարություն և ժողովրդավարություն» կուսակցության (DEM) կողմից, որը մեղադրել է Դամասկոսին քրդական և ասորական քաղաքացիական տարածքները թիրախավորելու մեջ և պնդել, որ դրանում ներգրավված են Թուրքիայի կողմից աջակցվող զինված խմբավորումներ։

DEM կուսակցության խոսնակը կոչ է արել Դամասկոսին «դադարեցնել քրդերի և ասորիների վրա հարձակումները»։

Թարգմանությունը՝ Էմմա Չոբանյանի