10.09.2026 | 23:04
ԿԳՄՍ նախարարը մանկավարժների հետ ոլորտային հարցեր է քննարկել
Զելենսկին՝ ԱՄՆ անվտանգության երաշխիքների մասին. փաստաթուղթը պատրաստ է Թրամփի հետ վերջնականացման
Քաղաքականություն
08.01.2026 | 20:51
ԱՄՆ-ի կողմից Ուկրաինայի անվտանգության երաշխիքների վերաբերյալ երկկողմ փաստաթուղթը, ըստ էության, պատրաստ է. հաջորդ քայլը դրա վերջնական մշակումն է ամենաբարձր մակարդակով։ Այս մասին հաղորդում է ՌԲԿ Ուկրաինան՝ հղում անելով Ուկրաինայի նախագահ Վլադիմիր Զելենսկիի Telegram ալիքին։
«[Անվտանգության և պաշտպանության խորհրդի քարտուղար] Ռուստեմ Ումերովը զեկուցել է մեր թիմի՝ երեկ Ֆրանսիայում կայացած բանակցությունների արդյունքների մասին։ Ուկրաինայի անվտանգության երաշխիքների վերաբերյալ երկկողմ փաստաթուղթը, ըստ էության, պատրաստ է վերջնականացման ԱՄՆ նախագահի հետ ամենաբարձր մակարդակով»,- հայտարարել է Զելենսկին։
Նրա խոսքով՝ կարևոր է, որ Ուկրաինան շարունակի ինտեգրել եվրոպական և ամերիկյան թիմերի աշխատանքը։ Բանակցային թիմերը համատեղ քննարկել են նաև վերակառուցման և տնտեսական զարգացման վերաբերյալ փաստաթղթեր։
«Քննարկվել են նաև պատերազմի ավարտի հիմնական շրջանակին վերաբերող բարդ հարցեր, և ուկրաինական կողմը ներկայացրել է այս փաստաթղթի վերջնական տարբերակի մշակման հնարավոր տարբերակները: Մենք հասկանում ենք, որ ամերիկյան կողմը կկապվի Ռուսաստանի հետ, և մենք սպասում ենք արձագանքի այն մասին՝ արդյո՞ք ագրեսորն իսկապես պատրաստ է դադարեցնել պատերազմը»,- հավելել է Ուկրաինայի նախագահը։
Նա նաև ընդգծել է, որ Կիև վերադառնալուց հետո ուկրաինական բանակցային թիմը կզեկուցի հանդիպումների բոլոր մանրամասների մասին։
«Մենք նաև մեր գործընկերներին տեղեկացնում ենք ռուսական հարվածների հետևանքների մասին։ Այս համատեքստում կարևոր է, որ Ռուսաստանի վրա ճնշումը մեծանա նույնքան ինտենսիվ, որքան բանակցային թիմերն են աշխատում։ Ապագա անվտանգության երաշխիքների իրագործելիությունը պետք է ցույց տրվի գործընկերների կողմից ագրեսորի վրա արդյունավետ ճնշում գործադրելու՝ արդեն այս փուլում կարողությամբ»,- հավելել է Զելենսկին։
Թարգմանությունը՝ Էմմա Չոբանյանի
