Նովոռոսիյսկ ուղևորվող լցանավը Թուրքիայի ափերի մոտ ԱԹՍ-ի հարձակման է ենթարկվել

Ռուսաստանի Նովոռոսիյսկ նավահանգիստ ուղևորվող «Elbus» լցանավը հունվարի 7-ի երեկոյան Թուրքիայում Սև ծովի ափերի մոտ հարձակման է ենթարկվել անհայտ անօդաչու թռչող սարքի կողմից, հաղորդել է թուրքական Ortadogu պարբերականը։ Թուրքիայի, Ռուսաստանի, Ուկրաինայի կամ այլ երկրների իշխանությունների կողմից որևէ հայտարարություն այս կապակցությամբ չի եղել, գրում է BBC-ի ռուսական ծառայությունը։

Lloyd’s List-ի տեղեկացմամբ էլ՝ հունվարի 7-ին Պալաուի դրոշի ներքո նավարկող Suezmax լցանավը շարժվում էր դեպի արևելք՝ թուրքական ափից մոտավորապես 30 մղոն հեռավորության վրա: Մոտավորապես ժամը 10:00-ին այն ենթարկվել է անօդաչու ծովային տրանսպորտային միջոցների և անօդաչու թռչող սարքերի հարձակման (չի նշվում, թե քանիսն են ներգրավված եղել): Տրանսպոնդերի տվյալները ցույց են տալիս, որ այդ պահին լցանավը շեղվել է իր ուղղությունից և կտրուկ շրջվել դեպի թուրքական ափ։

Ըստ Ortadogu-ի՝ փորձեր են արվում նավը քարշակով տեղափոխել Ինեբոլուի նավահանգիստ։ MarineTraffic-ը նաև ցույց է տալիս, որ լցանավը գտնվում է Ինեբոլուի մոտակայքում։

Նավի վնասվածքների կամ ջրի աղտոտման մասին տեղեկություններ չկան։

Միջազգային ծովային կազմակերպության տվյալների բազայի համաձայն՝ այս անունով նավը կառուցվել է 2005 թվականին և չորս անգամ փոխել է գրանցումը (Լիբերիա, Մարշալյան կղզիներ, կրկին Լիբերիա, 2025 թվականի նոյեմբերից՝ Պալաու. այս իրավասությունները հայտնի են որպես «հարմարավետության դրոշներ»)։ Նոյեմբերից ի վեր լցանավի սեփականատերը Հոնկոնգում գրանցված Qing Ju Shipping Ltd ընկերությունն է։

Նշենք, որ նոյեմբերին և դեկտեմբերին ռուսական նավթ տեղափոխող լցանավերի վրա հինգ հարձակում է տեղի ունեցել՝ ինչպես Սև ծովում, այնպես էլ դրա ջրերից դուրս։ Այս հարձակումները կապվել են Ուկրաինայի հետ, չնայած Կիևը հերքել է դրանցից մի քանիսին իր մասնակցությունը։