30.10.2026 | 01:09
Երկրաշարժ Ջերմուկ քաղաքից 15 կմ հյուսիս-արևելք
Թուրքիան պատրաստ է օգնել Սիրիայի կառավարությանը քրդական ուժերի դեմ պայքարում
Քաղաքականություն
08.01.2026 | 20:10
Թուրքիայի զինված ուժերը պատրաստ են «աջակցել» Սիրիայի կառավարությանը՝ հյուսիսարևմտյան Հալեպ քաղաքում քուրդ զինյալների դեմ պայքարում, եթե Դամասկոսն օգնություն խնդրի, հայտարարել է երկրի Պաշտպանության նախարարության պաշտոնյան, գրում է Turkish Minute-ը։
Նա լրագրողներին ասել է, որ Թուրքիան «աջակցում է Սիրիայի պայքարին ահաբեկչական կազմակերպությունների դեմ» և «ուշադիր հետևում է» հյուսիսում տեղի ունեցող զարգացումներին։
Այս շաբաթ մահացու բախումներ են տեղի ունեցել Սիրիայի կառավարական ուժերի և քուրդ մարտիկների միջև, քանի որ երկու կողմերն էլ մինչ օրս չեն կարողացել իրականացնել անցյալ տարվա մարտի համաձայնագիրը, որի համաձայն՝ քրդերի կիսաինքնավար վարչակազմը և բանակը միավորվելու էին Սիրիայի նոր իսլամիստական կառավարության հետ։
Քրդերը պնդում են ապակենտրոն կառավարման հարցում, որը Սիրիայի նոր իշխանությունները մերժում են։
Առանձին հայտարարության մեջ Թուրքիայի խորհրդարանի խոսնակ Նուման Քուրթուլմուշը նշել է, որ Անկարան ժամ առ ժամ հետևում է Հալեպում տեղի ունեցող զարգացումներին և պատրաստ է աջակցություն ցուցաբերել՝ հակամարտությունը դադարեցնելու համար։
Չնայած Դամասկոսի կողմից տրված հավաստիացումներին, որ Սիրիայի բոլոր համայնքները պաշտպանված կլինեն, փոքրամասնությունները շարունակում են զգուշավոր լինել նոր իշխանությունների օրոք իրենց ապագայի վերաբերյալ։
Թարգմանությունը՝ Էմմա Չոբանյանի
